બોટાદ જિલ્લાના રાણપુર તાલુકામાં ખનીજ માફિયાઓ બેફામ બન્યા હોવાની ગંભીર ઘટના સામે આવી છે. રાણપુર તાલુકાના નાગનેશ ગામે ખેતર પાસે ચાલી રહેલી ગેરકાયદેસર ખનીજ ચોરીનો વિરોધ કરવો સ્થાનિક ખેડૂત પિતા-પુત્રને ભારે પડ્યો છે. પ્રાથમિક માહિતી અનુસાર, નાગનેશ ગામના રાજુભા ઝાલા અને તેમના પુત્ર અનિરુદ્ધસિંહ ઝાલાના ખેતર નજીક ખનીજ ચોરી થતી હોય, તેમણે ખનીજ માફિયાઓને ના પાડી હતી. આ બાબતનો ખાર રાખીને કિશોરસિંહ ઝાલા, વિક્રમભાઈ દિલુભા અને દિગ્વિજયસિંહ ગજરાજસિંહ સહિત 7 થી 8 જેટલા શખ્સોના ટોળાએ પિતા-પુત્ર પર અચાનક જીવલેણ હુમલો કરી દીધો હતો.

નાગનેશ ગામે ખનીજ ચોરી અટકાવતા પિતા-પુત્ર પર હુમલો

ઈજાગ્રસ્ત પિતા-પુત્રએ હોસ્પિટલના ખાટલેથી ગંભીર આક્ષેપો કરતાં જણાવ્યું હતું કે, હુમલાખોરોએ પહેલાં તેમની ઉપર ડમ્પર ચડાવીને જાનથી મારી નાખવાની કોશિશ કરી હતી. એટલું જ નહીં, આરોપીઓએ બંદૂકમાંથી ફાયરિંગ કરવાનો પણ પ્રયાસ કર્યો હતો, પરંતુ કોઈ કારણોસર બંદૂકમાંથી મિસફાયર થતાં કે ફાયરિંગ ન થતાં, ઉશ્કેરાયેલા હુમલાખોરોએ પોતાની પાસે રહેલા તીક્ષ્ણ હથિયારો વડે પિતા-પુત્ર પર બેફામ ઘા ઝીંકી દીધા હતા. આ લોહિયાળ હુમલામાં રાજુભા અને અનિરુદ્ધસિંહ બંનેને શરીરે ગંભીર ઈજાઓ પહોંચી હતી.

7 થી 8 શખ્સો સામે હુમલાનો આક્ષેપ!

ઘટના બાદ લોહીલુહાણ હાલતમાં બંને પિતા-પુત્રને તાત્કાલિક સ્થાનિક લોકોની મદદથી પ્રથમ રાણપુર સરકારી હોસ્પિટલ ખાતે ખસેડવામાં આવ્યા હતા. જોકે, તેમની શારીરિક સ્થિતિ અત્યંત નાજુક હોવાથી વધુ સારવાર અર્થે તેમને બોટાદની ખાનગી હોસ્પિટલમાં રીફર કરવામાં આવ્યા છે. બનાવની જાણ થતાં જ રાણપુર પોલીસ સ્ટેશનના પીઆઈ એસ. એ. પટેલ સહિતનો પોલીસ કાફલો હોસ્પિટલ પહોંચ્યો હતો. રાણપુર પોલીસે નાગનેશ ગામે મારામારી અને હુમલાની ઘટનાની પુષ્ટિ કરીને ઈજાગ્રસ્તોનું નિવેદન નોંધવા સહિત આરોપીઓને ઝડપી પાડવા ચક્રો ગતિમાન કર્યા છે.

આ પણ વાંચો: Ambaji: સાત દિવસમાં 43 લાખથી વધુ ભક્તોએ કર્યા મા અંબાના પાવન દર્શન; ભંડારમાં રૂ. 2.16 કરોડથી વધુની આવક