છોટાઉદેપુર લોકસભા બેઠકના સાંસદ જશુભાઈ રાઠવાએ જનહિતના કાર્યોને ધ્યાનમાં રાખીને રેલવે વ્યવસ્થાની રૂબરૂ મુલાકાત લીધી હતી. સાંસદે અચાનક છોટાઉદેપુર રેલવે સ્ટેશન પર પહોંચીને ત્યાંની સ્થિતિનું નિરીક્ષણ કર્યું હતું. આ સાથે જ તેમણે છોટા ઉદેપુરથી પ્રતાપનગર સુધીની ટ્રેનમાં બેસીને સામાન્ય મુસાફરોની જેમ જ મુસાફરી કરી હતી અને જમીની હકીકતથી વાકેફ થયા હતા.
મુસાફરો સાથે સીધો સંવાદ અને સમસ્યાઓનું નિવારણ
ટ્રેન પ્રવાસ દરમિયાન સાંસદે ડબ્બામાં બેઠેલા મુસાફરો સાથે સીધી વાતચીત કરી હતી. મુસાફરોને રેલવેમાં મળી રહેલી સુવિધાઓ વિશે પૂછપરછ કરી અને તેમના અનુભવો તેમજ સૂચનો ધ્યાનપૂર્વક સાંભળ્યા હતા. મુસાફરો દ્વારા રજૂ કરવામાં આવેલી વિવિધ મુશ્કેલીઓ અને રેલવે સુવિધાઓ વધારવા અંગેની માંગણીઓ પર સાંસદે સકારાત્મક પ્રતિસાદ આપીને યોગ્ય કાર્યવાહી કરવાની ખાતરી આપી હતી.
