છોટાઉદેપુર જિલ્લાના નસવાડી તાલુકામાંથી એક આઘાતજનક સમાચાર સામે આવ્યા છે. નસવાડીના કુકરદા ગામે ખેતરમાં કામ કરી રહેલા એક આધેડ ખેડૂતનું હાઈટેન્શન વીજ લાઈનનો કરંટ લાગવાના કારણે ઘટના સ્થળે જ મોત નીપજ્યું છે. આ અકસ્માતને પગલે કુકરદા ગામ સહિત સમગ્ર પંથકમાં ભારે અરેરાટી સાથે શોકનું મોજું ફરી વળ્યું છે.
ખેતરમાં વાંસ કાપતા સમયે સર્જાઈ મોટી હોનારત
મળતી માહિતી મુજબ, કુકરદા ગામે રહેતા આશરે 50 વર્ષીય ખેડૂત ખામજીભાઇ રેલીયાભાઈ ડુભીલ પોતાના ખેતરમાં વાંસ કાપી રહ્યા હતા. આ દરમિયાન ખેતરમાંથી પસાર થતી વીજ કંપનીની હાઈટેન્શન લાઈનના વાયરો નીચે નમી ગયા હોવાથી, તે વાંસ સાથે અડી ગયા હતા. વાંસ કાપતી વખતે અચાનક જ આ નમી ગયેલા વાયરોમાંથી જોરદાર કરંટ પસાર થતા ખામજીભાઇ તેની ઝપેટમાં આવી ગયા હતા અને ઘટના સ્થળે જ તેમનું મોત થયું હતું.
MGVCL તંત્રની ઘોર બેદરકારી સામે લોકોનો આક્રોશ
આ ચકચારી ઘટનાને પગલે સ્થાનિક લોકોમાં મધ્ય ગુજરાત વીજ કંપની સામે ભારે રોષ જોવા મળી રહ્યો છે. ગ્રામજનોનો સીધો આક્ષેપ છે કે, MGVCLના નમી ગયેલા જોખમી વાયરોને ઊંચા કરવા માટે અગાઉ પણ રજૂઆતો થઈ હોવા છતાં MGVCL તંત્ર દ્વારા સમયસર ધ્યાન આપ્યું ન હતું. MGVCL તંત્રની આ ઘોર બેદરકારી અને આળસુ નીતિના કારણે જ આજે એક નિર્દોષ ખેડૂતે પોતાનો જીવ ગુમાવવો પડ્યો છે.
પોલીસે ઘટના સ્થળે પહોંચી કાયદેસરની કાર્યવાહી હાથ ધરી
ઘટનાની જાણ થતાં જ નસવાડી પોલીસનો કાફલો તાત્કાલિક ઘટના સ્થળે દોડી ગયો હતો. પોલીસે મૃતક ખેડૂત ખામજીભાઇના મૃતદેહને કબજે કરી પોસ્ટ મોર્ટમ અર્થે ખસેડવાની તજવીજ હાથ ધરી છે. આ મામલે પોલીસે અકસ્માતે મોતનો ગુનો નોંધી આગળની કાયદેસરની તપાસ શરૂ કરી છે. સ્થાનિકો હવે આ મામલે જવાબદાર વીજ અધિકારીઓ સામે કડક પગલાં ભરવાની માગ કરી રહ્યા છે.
આ પણ વાંચો - Chhotaudepur : કલેક્ટર ગાર્ગી જૈનનો સપાટો, ફિલ્મી ઢબે પીછો કરીને રેતી ભરેલા 33 વાહનો જપ્ત
