અંબાજી નજીક આબુરોડ સ્થિત માનપુર વિસ્તારમાં એક સ્પા સેન્ટરમાં ગુજરાતી યુવક સાથે મારામારીની ગંભીર ઘટના સામે આવી છે. માનપુર ગવર્મેન્ટ સ્કૂલ નજીક આવેલા ગોલ્ડન રિલેક્સ સ્પા સેન્ટરમાં આ હોબાળો થયો હતો. આ મારામારીનો વીડિયો સોશિયલ મીડિયા પર વાયરલ થતાં સ્થાનિક સ્તરે ભારે ચર્ચા જાગી છે.વીડિયો વાયરલ થતાંની સાથે જ સમગ્ર વિસ્તારમાં ભારે સનસનાટી ફેલાઈ ગઈ હતી. બનાવ અંગેની જાણ સ્થાનિક પોલીસ તંત્રને કરવામાં આવતા આબુરોડ શહેર પોલીસનો કાફલો તાત્કાલિક અસરથી ઘટનાસ્થળે પહોંચી ગયો હતો અને પરિસ્થિતિ પર કાબૂ મેળવવા માટે કાર્યવાહી હાથ ધરી હતી.
ઉગ્ર બોલાચાલી બાદ મારામારી કરવામાં આવી
આબુરોડના માનપુર વિસ્તારમાં ગવર્મેન્ટ સ્કૂલ પાસે ગોલ્ડન રિલેક્સ સ્પા સેન્ટર આવેલું છે. આ સ્પા સેન્ટરમાં અચાનક કોઈ અગમ્ય બાબતે ભારે હોબાળો મચી ગયો હતો. સ્પા સેન્ટરની અંદર એક ગુજરાતી યુવક સાથે ઉગ્ર બોલાચાલી બાદ મારામારી કરવામાં આવી હોવાનો ગંભીર આક્ષેપ કરવામાં આવ્યો છે. આ મારામારીની ઘટનામાં યુવકને ઇજાઓ પહોંચી હતી. સ્પા સેન્ટરની અંદર થયેલા આ હુમલા બાદ ઇજાગ્રસ્ત યુવક ત્યાંથી જીવ બચાવીને નાસી છૂટ્યો હોવાની માહિતી પણ સામે આવી રહી છે. દરમિયાન આ મારામારીની સમગ્ર ઘટનાનો વીડિયો સોશિયલ મીડિયા પ્લેટફોર્મ પર ખૂબ જ ઝડપથી વાયરલ થઈ ગયો હતો. સ્પા સેન્ટરમાં થયેલા આ મોટા હોબાળા અને મારામારીના બનાવને પગલે આસપાસના સ્થાનિક લોકોના મોટા ટોળાં ઘટનાસ્થળે એકત્રિત થઈ ગયા હતા.