અમરેલી જિલ્લાના રાજુલા પંથકમાંથી એક હૃદયદ્રાવક અકસ્માતના સમાચાર સામે આવ્યા છે. ભાવનગર-સોમનાથ રાષ્ટ્રીય ધોરીમાર્ગ પર રાજુલાના દાતાર વિસ્તાર પાસે સોમનાથ તરફથી પૂરઝડપે આવી રહેલી એક તુફાન ગાડીએ રસ્તો ઓળંગી રહેલા એક રાહદારીને જોરદાર અડફેટે લીધો હતો. આ ટક્કર એટલી જોરદાર હતી કે, રાહદારીનું ઘટના સ્થળે જ કમકમાટીભર્યું મોત નીપજ્યું હતું.

અકસ્માત સર્જનારું વાહન નડિયાદ પાસિંગનું હોવાનું ખુલ્યું

પ્રાપ્ત વિગતો મુજબ, અકસ્માત સર્જનારી તુફાન ગાડી નડિયાદ પંથકની હોવાનું પ્રાથમિક તપાસમાં સામે આવ્યું છે. અકસ્માતની આ કરુણ ઘટના બનતા જ આસપાસના લોકો એકત્ર થઈ ગયા હતા અને તાત્કાલિક ધોરણે ઇમરજન્સી સેવાઓનો સંપર્ક કરવામાં આવ્યો હતો. બનાવની જાણ થતાં જ 112 (Emergency Response Support System), 108 એમ્બ્યુલન્સ અને સ્થાનિક પોલીસ કાફલો તાત્કાલિક ઘટના સ્થળે દોડી આવ્યો હતો.

Amreli News: Pedestrian Killed in Toofan Car Road Accident on Bhavnagar-Somnath Highway

મૃતકની ઓળખ મેળવવા પોલીસની તજવીજ

અકસ્માતને પગલે પોલીસે મૃતદેહને કબ્જે કરીને પોસ્ટ મોર્ટમ અર્થે ખસેડવાની કાર્યવાહી હાથ ધરી છે. હાલ મૃતક વ્યક્તિ કોણ છે, અને ક્યાં રહે છે તેની કોઈ ઓળખ મળી શકી નથી, જેથી પોલીસે મૃતકની ઓળખ પ્રસ્થાપિત કરવા અને નાસી છૂટેલા વાહનચાલક સામે કાયદેસરની કડક કાર્યવાહી હાથ ધરવા માટેના ચક્રો ગતિમાન કર્યા છે.


આ પણ વાંચો: Amreli : સાવરકુંડલા હાઈવે પર ગમખ્વાર અકસ્માત: ST બસ-બાઈકની ટક્કરમાં 4નાં મોત, બે બાળકોનો પણ સમાવેશ