ભાવનગરના તળાજા અને પાલીતાણા માર્કેટિંગ યાર્ડમાં બોગસ પેઢીઓ ઊભી કરીને બેંક ખાતાં મારફતે નાણાંની હેરાફેરી કરવાના કૌભાંડમાં સ્પેશિયલ ઓપરેશન ગ્રુપ (SOG) દ્વારા તપાસ તેજ કરવામાં આવી છે. આ સમગ્ર મામલે અત્યાર સુધીમાં 5 આરોપીઓની ધરપકડ કરવામાં આવી છે. તપાસ દરમિયાન એસઓજીએ જેલમાં રહેલા કેસના માસ્ટરમાઇન્ડ મહંમદ તકી સહિત 3 શખ્સોનો જેલમાંથી કબજો મેળવ્યો છે. આ ઉપરાંત 3 બનાવટી સ્ટેમ્પ પણ કબજે કરવામાં આવ્યા છે.

બોગસ પેઢીઓ બનાવી બેંક ખાતાં ખોલાવ્યાં

મળતી વિગતો મુજબ, તળાજા અને પાલીતાણા માર્કેટિંગ યાર્ડના નામે બોગસ પેઢીઓ ઊભી કરવામાં આવી હતી. આ પેઢીઓના નામે બેંક ખાતાં ખોલાવી નાણાંની હેરાફેરી કરવામાં આવતી હોવાનો મામલો સામે આવ્યો છે. સમગ્ર કૌભાંડની તપાસ એસઓજીની ટીમ દ્વારા કરવામાં આવી રહી છે.

અત્યાર સુધી 5 આરોપીઓની ધરપકડ

આ કેસમાં એસઓજી દ્વારા અત્યાર સુધીમાં કુલ 5 આરોપીઓની ધરપકડ કરવામાં આવી છે. તપાસ દરમિયાન જેલમાં રહેલા ત્રણ આરોપીઓનો પણ કબજો મેળવવામાં આવ્યો છે. જેમાં કેસના માસ્ટરમાઇન્ડ મહંમદ તકી, રિઝવાન ઉર્ફે રિજ્જુ અને દોસ્ત મહંમદ વેલાણીનો સમાવેશ થાય છે.

3 બનાવટી સ્ટેમ્પ કબજે કરાયા

કૌભાંડની તપાસ દરમિયાન એસઓજીની ટીમે 3 જેટલા બનાવટી સ્ટેમ્પ પણ કબજે કર્યા છે. બોગસ પેઢીઓ ઊભી કરવા અને બેંક ખાતાં ખોલાવવા માટે બનાવટી દસ્તાવેજોનો ઉપયોગ થયો હતો કે કેમ તે દિશામાં તપાસ કરવામાં આવી રહી છે.

સુરતનાં બોગસ બેંક ખાતાંની તપાસ

આ સમગ્ર કૌભાંડમાં સુરત ખાતે ખોલાવવામાં આવેલા બોગસ બેંક ખાતાંની પણ એસઓજી દ્વારા તપાસ કરવામાં આવી રહી છે. નાણાંની હેરાફેરીમાં આ ખાતાંનો ઉપયોગ કેવી રીતે થયો હતો તે સહિતની વિગતો તપાસવામાં આવી રહી છે.

ED અને GST વિભાગ પણ તપાસમાં જોડાશે

આ કૌભાંડની ગંભીરતાને ધ્યાનમાં રાખીને આગામી સમયમાં એન્ફોર્સમેન્ટ ડિરેક્ટોરેટ (ED) અને GST વિભાગ પણ તપાસમાં જોડાય તેવી શક્યતા છે. હાલમાં એસઓજી દ્વારા આરોપીઓની પૂછપરછ અને નાણાકીય વ્યવહારોની તપાસ આગળ ધપાવવામાં આવી રહી છે. 


આ પણ વાંચો :  Cyclone Akvan : અલ નીનોની અસરથી ‘અકવાન’નો માર્ગ બદલાયો, 80ની ઝડપે લેન્ડફોલ