સોશિયલ મીડિયા પર ઊંચા વળતર અને જૂની વસ્તુઓ વેચીને રાતોરાત કરોડપતિ બનવાની લોભામણી જાહેરાતો કેટલી જોખમી સાબિત થઈ શકે છે, તેનો વધુ એક ચોંકાવનારો કિસ્સો ભાવનગર જિલ્લામાંથી સામે આવ્યો છે. સિહોર તાલુકાના રાજપરા (ખોડિયાર) ગામે રહેતા અને ટપાલ વિભાગમાંથી નિવૃત્ત થયેલા ૭૦ વર્ષીય વૃદ્ધ સાયબર માફિયાઓની જાળમાં ફસાઈ જતાં તેમણે પોતાની જીવનભરની કમાણીમાંથી રૂ. 23 લાખથી વધુની માતબર રકમ ગુમાવવાનો વારો આવ્યો છે. આ મામલે ભાવનગર સાયબર ક્રાઈમ પોલીસ સ્ટેશનમાં વિધિવત ગુનો નોંધી તપાસ શરૂ કરાઈ છે.
ફેસબુક રીલ્સ બની છેતરપિંડીની જાળ
પોસ્ટ ઓફિસમાંથી નિવૃત્ત થયેલા વૃદ્ધ શીવલાલભાઈ ગોવીંદભાઈ સોલંકી પોતાના મોબાઈલમાં ફેસબુક રીલ્સ જોઈ રહ્યા હતા. તે દરમિયાન જૂના સિક્કા ઊંચી કિંમતે ખરીદવાની એક આકર્ષક જાહેરાત તેમના ધ્યાને આવી હતી. શીવલાલભાઈ પાસે જૂના સિક્કા સંગ્રહાયેલા હોવાથી તેમણે રીલ્સમાં આપેલા નંબર પર સંપર્ક કર્યો હતો.સામેથી ‘સવિતા’ નામની મહિલાએ વાતચીત કરી સિક્કાના ફોટા મંગાવ્યા હતા અને ખાતરી આપી હતી કે આ સિક્કા કંપની રૂ. 60 લાખમાં ખરીદી લેશે. શરૂઆતમાં પ્રોસેસ શરૂ કરવા માટે કંપની રજિસ્ટ્રેશન ફી પેટે માત્ર રૂ. 500 ઓનલાઈન મંગાવવામાં આવ્યા હતા.