છોટાઉદેપુર જિલ્લાના નસવાડી ટાઉનમાં આવેલી સ્ટેશન શાળામાં શિક્ષણ જગતને શરમાવે તેવી એક ચોંકાવનારી ઘટના સામે આવી છે. જ્યાં વિદ્યાના ધામ સમાન શાળા પરિસરમાં જ મહિલા આચાર્ય અને શિક્ષિકા વચ્ચે કોઈ બાબતે ભારે બોલાચાલી અને કકળાટ સર્જાયો હતો. આ બાબત એટલી હદે વણસી ગઈ કે શાળાનું વાતાવરણ તંગ બની ગયું હતું.
ઉગ્ર વિવાદ બાદ આચાર્યને બે લાફા માર્યાનો આક્ષેપ
મળતી માહિતી મુજબ, નસવાડી સ્ટેશન શાળામાં ફરજ બજાવતા મહિલા આચાર્ય અને શિક્ષિકા વચ્ચે સામાન્ય વાતમાં વિવાદ શરૂ થયો હતો. આ વિવાદ દરમિયાન આવેશમાં આવી ગયેલી શિક્ષિકાએ મહિલા આચાર્યને બે લાફા મારી દીધા હોવાનો ગંભીર આક્ષેપ કરવામાં આવ્યો છે. શાળા સમય દરમિયાન જ બનેલી આ ઘટનાને પગલે અન્ય સ્ટાફ તેમજ વિદ્યાર્થીઓમાં ભારે અફરાતફરી અને આશ્ચર્યનો માહોલ સર્જાયો હતો.
