ગાંધીનગરથી સ્ટેટ મોનિટરિંગ સેલ દ્વારા ગીર સોમનાથ જિલ્લાના કોડીનાર પંથકમાં સતત સાતમી વખત સપાટો બોલાવવામાં આવ્યો છે. આમ છતાં, સ્થાનિક સ્તરે દારૂ અને જુગારનું દષણ યથાવત રહેતા અનેક ગંભીર સવાલો ઊભા થયા છે. છેક ગાંધીનગરથી SMCની ટીમ બાતમી મેળવીને રેડ કરે, ત્યારે મોટો સવાલ એ થાય છે કે સ્થાનિક પોલીસ અને એલસીબી (LCB) શું કરી રહી છે?
મચ્છી માર્કેટ પાછળથી ઝડપાયો રૂ.3.84 લાખનો મુદ્દામાલ
તાજેતરમાં SMCની ટીમે કોડીનારના મચ્છી માર્કેટ પાછળના વિસ્તારમાં દારૂના અડ્ડા પર સફળ રેડ પાડી હતી. આ દરોડા દરમિયાન પોલીસે કુલ 3.84 લાખ રૂપિયાનો શંકાસ્પદ મુદ્દામાલ જપ્ત કર્યો છે. સ્થળ પરથી પોલીસે કડક કાર્યવાહી હાથ ધરીને બુટલેગરો અને સંચાલકોમાં ભારે ફફડાટ ફેલાવી દીધો છે.
વિદેશી દારૂ, બિયર અને દેશી દારૂનો મોટો જથ્થો જપ્ત
આ દરોડામાં SMCની ટીમે મોટા પ્રમાણમાં પ્રતિબંધિત નશાકારક સામગ્રી કબ્જે કરી છે. પોલીસે સ્થળ પરથી 760 નંગ વિદેશી દારૂ અને બિયરની બોટલો તેમજ 57 લીટર દેશી દારૂ જપ્ત કર્યો છે. આટલી મોટી માત્રામાં નશો પકડાયા બાદ પંથકમાં બુટલેગરોનું નેટવર્ક કેટલું મજબૂત છે તેની પોપલ ખુલી ગઈ છે.
પાંચ આરોપીઓ ઝડપાયા, બે ફરાર અને મહિલા સંચાલક સામે ગુનો
SMCની આ આક્રમક કાર્યવાહીમાં કુલ 5 જેટલા શખ્સો પોલીસના સકંજામાં આવી ગયા છે, જ્યારે અન્ય 2 આરોપીઓ સ્થળ પરથી નાસી છૂટવામાં સફળ રહ્યા છે. આ રેડમાં દારૂના સ્ટેન્ડની સંચાલક મહિલા સહિતના મુખ્ય આરોપીઓ સામે કાયદેસરની કડક કાર્યવાહી હાથ ધરવામાં આવી છે, જેનાથી ગુનેગારોમાં નાસભાગ મચી ગઈ છે.
સ્થાનિક પોલીસનું ઇન્ટેલિજન્સ તંત્ર અને LCB સવાલોના ઘેરામાં
SMCની સતત સાતમી સફળ કાર્યવાહીએ સ્થાનિક પોલીસ અને LCB ની કાર્યશૈલી સામે બંદૂક તાકી દીધી છે. જો છેક ગાંધીનગરની ટીમને દારૂના ગેરકાયદે અડ્ડાની બાતમી મળી શકતી હોય, તો સ્થાનિક પોલીસ તંત્ર અને ઇન્ટેલિજન્સને તેની ભનક કેમ ન લાગી? આ મોટો સવાલ જિલ્લાના ઉચ્ચ અધિકારીઓ સમક્ષ ચર્ચાનો વિષય બન્યો છે.
ભવિષ્યની કાર્યવાહી અને ઉચ્ચસ્તરીય મૂલ્યાંકનની માગ
જિલ્લામાં આટલા મોટા જથ્થામાં દારૂ ક્યાંથી અને કેવી રીતે પ્રવેશે છે તે તપાસનો મોટો વિષય છે. SMCના વારંવારના દરોડા વચ્ચે હવે જનતા અનેક પ્રકારની ચર્ચાઓ કરી રહી છે. શું હવે લાપરવાહ સ્થાનિક પોલીસ અને LCB ની કામગીરીનું કોઈ ઉચ્ચસ્તરીય મૂલ્યાંકન થશે અને કડક પગલાં લેવાશે? તે જોવું રહ્યું.
આ પણ વાંચો: Gir Somnathમાં ખેલ મહાકુંભની તારીખ બદલાતા ખેલાડીઓ અને વાલીઓ રઝળ્યા, વહેલી સવારે ઇણાજ પહોંચતા ભારે હાલાકી!
