ખેડા જિલ્લામાં અગાઉ જિલ્લા પંચાયતના સદસ્યના દારૂ કનેક્શન બાદ હવે કપડવંજ તાલુકા પંચાયતના ભાજપના સદસ્યના પરિવારનું નામ દારૂના ગોરખધંધામાં ખુલતા ચકચાર મચી ગઈ છે. ગાંધીનગરની સ્ટેટ મોનિટરિંગ સેલ (SMC) ની ટીમને ચોક્કસ બાતમી મળી હતી કે, કપડવંજ તાલુકા પંચાયતની વઘાસ બેઠકના ભાજપના સદસ્ય મફતભાઈ ઝાલાનો પુત્ર લિંકન ઝાલા વિદેશી દારૂની મોટી ખેપ લઈને પસાર થવાનો છે. આ બાતમીના આધારે એસએમસીની ટીમે કપડવંજ-કઠલાલ રોડ પર આવેલા મહોર નદીના બ્રિજ પાસે વોચ ગોઠવી હતી.
પોલીસ એપ્લિકેશને ખોલી પોલ
વોચ દરમિયાન ત્યાંથી પસાર થઈ રહેલી એક શંકાસ્પદ સફેદ કલરની હ્યુન્ડાઇ ક્રેટા કારને પોલીસે આંતરી હતી. કારની તલાશી લેતા તેમાંથી વિદેશી દારૂ અને બિયરની કુલ 2160 બોટલો મળી આવી હતી. પ્રાથમિક તપાસમાં કાર પર અમદાવાદ પાસિંગની (GJ-01-KW-2308) નંબર પ્લેટ લગાવેલી હતી. જોકે, અધિકારીઓને શંકા જતા તેમણે ડિજિટલ પ્લેટફોર્મ ઇ-ગુજકોપ (e-GujCop) માં ચેક કરતા આ નંબર ખોટો સાબિત થયો હતો અને કારનો અસલી નંબર મહેસાણા પાસિંગનો (GJ-02-CG-5012) હોવાનો મોટો ખુલાસો થયો હતો.પોલીસ પૂછપરછમાં આરોપી લિંકન ઝાલા અને તેના સાગરીત જીગ્નેશ ઝાલાએ કબૂલાત કરી હતી કે, થવાદના નરેશ રાવળ અને માલપુરના દીપકસિંહ ચૌહાણ નામના બુટલેગરો રાજસ્થાનથી હેરીયર કારમાં આ દારૂ લાવ્યા હતા. ત્યારબાદ કપડવંજના વઘાસ તળાવ પાસે આ જથ્થો લોકલ ડિલિવરી માટે ક્રેટા કારમાં ટ્રાન્સફર કરવામાં આવ્યો હતો.
