મહેસાણા શહેરમાં કાયદો અને વ્યવસ્થાની સ્થિતિને લઈને પોલીસ બેડામાં મોટો ધડાકો થયો છે. મહેસાણા બી ડિવિઝન પોલીસ સ્ટેશન હેઠળના વિસ્તારમાં ગત 30 ઓગસ્ટના રોજ એક જ દિવસમાં બે મોટી અને ગંભીર ગુનાહિત ઘટનાઓ સામે આવી હતી. જેને પગલે પોલીસ પ્રશાસને તાત્કાલિક પગલાં ભરીને બી ડિવિઝન પીઆઈ એ. આર. પટેલની જગ્યા પરથી તાત્કાલિક બદલી કરી દીધી છે.
કુખ્યાત ભાવેશ જીલીયા અને મોઢેરા રોડ હત્યાકાંડે મચાવી હતી ચકચાર
30 ઓગસ્ટના રોજ મહેસાણા બી ડિવિઝન વિસ્તારમાં બે અલગ-અલગ ઘટનાઓએ સમગ્ર શહેરમાં ભારે ચકચાર મચાવી દીધી હતી. જેમાં એક તરફ કુખ્યાત શખ્સ ભાવેશ જીલીયા સાથે સંકળાયેલી ઘટના સામે આવી હતી, તો બીજી તરફ મોઢેરા રોડ પર તીક્ષ્ણ હથિયાર વડે ગળું કાપીને નિર્મમ હત્યા કરી દેવાની ભયાનક દુર્ઘટના બની હતી. એક જ દિવસમાં ક્રમિક બનેલા આ બે મોટા ગુનાઓને કારણે વિસ્તારમાં કાયદો અને વ્યવસ્થાની પરિસ્થિતિ સામે ગંભીર પ્રશ્નાર્થો ઊભા થયા હતા.
PI એ. આર. પટેલને તાત્કાલિક હેડક્વાર્ટર ખાતે ખસેડાયા
મહેસાણા શહેરમાં શાંતિ અને સુરક્ષા જાળવવામાં આવેલી નિષ્ક્રિયતા કે બેદરકારીને ધ્યાનમાં રાખીને ઉચ્ચ પોલીસ અધિકારીઓ દ્વારા આ નિર્ણય લેવામાં આવ્યો હોવાનું માનવામાં આવે છે. સફાળે જાગેલા પોલીસ તંત્ર દ્વારા બી ડિવિઝનના પીઆઈ એ. આર. પટેલને તેમની વર્તમાન જવાબદારીમાંથી મુક્ત કરીને તાત્કાલિક અસરથી પોલીસ હેડક્વાર્ટર ખાતે મૂકી દેવાનો હુકમ કરવામાં આવ્યો છે.
ગુનાખોરી ડામવા માટે પ્રશાસનનું કડક વલણ
મહેસાણા શહેરમાં વધતી જતી ગંભીર ગુનાખોરી અને કાયદાના ઉલ્લંઘનની ઘટનાઓને ડામવા માટે પોલીસ વિભાગે હવે કડક વલણ અપનાવ્યું છે. ઉચ્ચ અધિકારીઓની આ ત્વરિત કાર્યવાહીથી કાયદો અને વ્યવસ્થા પ્રત્યે બેદરકારી દાખવતા અન્ય કર્મચારીઓ અને અધિકારીઓમાં પણ ફફડાટ વ્યાપી ગયો છે.
કાયદો અને વ્યવસ્થા સુચારુ બનાવવા માટે નવી નિમણૂકની તૈયારી
બી ડિવિઝન પોલીસ સ્ટેશનના પીઆઈની હેડક્વાર્ટર ખાતે બદલી થતાં હવે આ સંવેદનશીલ વિસ્તારની જવાબદારી અન્ય કોઈ અનુભવી અને કડક અધિકારીને સોંપવામાં આવે તેવી શક્યતાઓ સેવાઈ રહી છે. મહેસાણા બી ડિવિઝન વિસ્તારમાં શાંતિ જળવાઈ રહે અને ગુનેગારોમાં પોલીસનો ડર કાયમ રહે તે માટે આગામી દિવસોમાં સઘન ચેકિંગ અને પોલીસ પેટ્રોલિંગ વધારવાની દિશામાં કામગીરી હાથ ધરવામાં આવી છે.
આ પણ વાંચો: Mahesana ભાવેશ ઝીલિયા હુમલા કાંડમાં મોટો ખુલાસો, કટોસણ ગેંગનું વર્ચસ્વ જમાવવા 3 મહિનાથી થતી હતી રેકી, 6 આરોપીઓ ગિરફ્તાર
