મહેસાણા જિલ્લામાં ખનિજ ચોરી અને ગેરકાયદે વહન સામે ખાણ ખનિજ વિભાગે આક્રમક રૂખ અપનાવ્યો છે. વિભાગ દ્વારા હાથ ધરવામાં આવેલી અચાનક તપાસથી ખનિજ માફિયાઓમાં ભારે ફફડાટ ફેલાઈ ગયો છે.
મહેસાણા જિલ્લામાં ગેરકાયદે પ્રવૃત્તિઓ ડામવા માટે ખાણ ખનિજ વિભાગ સક્રિય બન્યું છે. ખાણ ખનિજ વિભાગના મદદનીશ ભૂસ્તરશાસ્ત્રી પ્રણવસિંહના માર્ગદર્શન હેઠળ કુલ 3 અલગ-અલગ વિશેષ ટીમો બનાવવામાં આવી હતી, જેમણે આ સફળ ઓપરેશન પાર પાડ્યું હતું.
ખાણ ખનિજ વિભાગની ટીમો દ્વારા જિલ્લાના મહેસાણા, વડનગર અને ઉંઝા તાલુકાના વિસ્તારોમાં સઘન ચેકિંગ હાથ ધરવામાં આવ્યું હતું. આ દરમિયાન સરકારી પરવાનગી (રોયલ્ટી પાસ) કરતા વધુ પ્રમાણમાં સાદી રેતી ભરીને પસાર થઈ રહેલા કુલ 9 ડમ્પરોને ઝડપી પાડવામાં આવ્યા હતા.
પકડાયેલા તમામ ડમ્પર સહિત કુલ 3.40 કરોડ રૂપિયાનો મુદ્દામાલ જપ્ત કરીને કાયદેસરની કાર્યવાહી હાથ ધરવામાં આવી છે. આ ગેરકાયદે ખનિજ વહન બદલ કુલ 14.22 લાખ રૂપિયાનો દંડ ફટકારીને તેની સફળતાપૂર્વક વસુલાત પણ કરવામાં આવી છે.
આ મોટી કાર્યવાહીને સફળ બનાવવા માટે માઇન્સ સુપરવાઇઝર સંજય ગુર્જર, કરણ સોની અને રોયલ્ટી ઇન્સપેક્ટર દિલિપ રબારી સહિતની ટીમે ઉત્કૃષ્ટ કામગીરી કરી હતી. તંત્રની આ કડક કાર્યવાહીથી ગેરકાયદે ખનિજ ખનન કરતા તત્વોમાં મોટો ડર બેસી ગયો છે.
આ પણ વાંચો: Explainer Kalpasar Project: ભૂતકાળ બની જશે દુષ્કાળ! કલ્પસર પ્રોજેક્ટથી 10 વર્ષ પછી...