પાટણ શહેરની સાઈબાબા ચોકડી પાસે આવેલી પ્રખ્યાત હોટલ '89' માં બનેલી એક ઘટનાએ સમગ્ર પંથક સહિત સોશિયલ મીડિયા પર સનસનાટી મચાવી દીધી છે. અમદાવાદથી પાટણ ફરવા અથવા કોઈ અંગત કામે આવેલું એક કપલ, જેમણે થોડા સમય પહેલાં જ પ્રેમલગ્ન કર્યા હતા, તેઓ હોટલ '89' માં રૂમ ભાડે રાખીને રોકાયા હતા. આ કપલમાં પત્ની શ્રેયા પટણી અને તેનો પતિ સામેલ હતા. હોટલના રજિસ્ટરમાં એન્ટ્રી કરાવ્યા બાદ બંને પોતાના રૂમમાં ગયા હતા.
પાટણમાં સનસનાટીપૂર્ણ મર્ડર
જોકે, રૂમની અંદર બંને વચ્ચે કોઈ બાબતે ઉગ્ર બોલાચાલી કે ઝઘડો થયો હોવાની આશંકા છે. આ ઝઘડો એટલો વિકરાળ બન્યો કે કળિયુગી પતિએ આવેશમાં આવીને (અથવા પૂર્વઆયોજિત કાવતરાના ભાગરૂપે) પોતાની જ પત્ની શ્રેયાની ઘાતકી હત્યા કરી નાખી અને લાશને રૂમમાં જ છોડી દીધી હતી. હત્યા કર્યા બાદ આરોપી પતિ ખૂબ જ શાંતિથી રૂમની બહાર નીકળ્યો હતો. તેણે હોટલના મેનેજર અને સંચાલકોને શંકા ન જાય તે માટે એક શાતિર ચાલ ચાલી હતી. તેણે કાઉન્ટર પર જઈને કહ્યું કે, "હું થોડા કામથી બહાર જાઉં છું, મારી પત્ની અંદર આરામ કરે છે. હું બહારથી ફોન કરું ત્યારે જ તમે રૂમનો દરવાજો ખોલજો." આટલું કહીને તે હોટલની બહાર નીકળી ગયો હતો.