પોરબંદરના ઓડદર ગામમાં સગીર પુત્રી પર લાંબા સમય સુધી દુષ્કર્મ આચર્યાના ગંભીર કેસમાં ફરાર આરોપી રમેશ છેલાણાને પોરબંદર LCBએ મુંબઈથી ઝડપી લીધો છે. આરોપી સામે હાર્બર મરીન પોલીસ સ્ટેશનમાં બળાત્કાર અને POCSO હેઠળ ગુનો નોંધાયો હતો.
ફરિયાદ મુજબ, ઓડદર ગામના રમેશ છેલાણા પર પોતાની જ સગીર પુત્રી સાથે 6 વર્ષ સુધી દુષ્કર્મ આચર્યાનો આરોપ છે. આરોપ છે કે સગીરાને ધમકાવીને સમગ્ર મામલો કોઈને ન જણાવવા માટે દબાણ કરવામાં આવતું હતું.
પોલીસ ફરિયાદ મુજબ, આરોપીએ સગીરાને માતાજીના તેમજ પોતાના પુત્રના સોગંદ અપાવીને આ મામલે કોઈને જાણ ન કરવા માટે દબાણ કર્યું હતું. સતત ધમકી અને દબાણના કારણે સગીરા લાંબા સમય સુધી આ અંગે ચૂપ રહી હોવાનો આરોપ છે.
કેસ નોંધાયા બાદ આરોપી પોલીસથી બચવા માટે ફરાર હતો. પોરબંદર LCBની ટીમે તપાસ હાથ ધરી આરોપી મુંબઈમાં હોવાની માહિતી મેળવી હતી. ત્યારબાદ કાર્યવાહી કરીને તેને મુંબઈથી ઝડપી લેવામાં આવ્યો હતો.
પોલીસના જણાવ્યા મુજબ, રમેશ છેલાણા અગાઉ પણ ગુનાહિત પ્રવૃત્તિઓને લઈને પોલીસના રડારમાં રહ્યો છે. થોડા સમય અગાઉ તેની સામે ગુજસિટોકની કલમો હેઠળ ગુનો નોંધવામાં આવ્યો હતો અને તેને જેલ હવાલે કરવામાં આવ્યો હતો.
હાલ આરોપીની ધરપકડ બાદ પોલીસે સમગ્ર કેસમાં વધુ તપાસ શરૂ કરી છે. સગીરાના નિવેદન સહિત કેસ સાથે જોડાયેલા અન્ય પુરાવા અને આરોપીની અગાઉની ગુનાહિત પ્રવૃત્તિઓ અંગે પણ તપાસ કરવામાં આવી રહી છે.
આ પણ વાંચો : Bengaluru : અભિનેત્રી રાન્યા રાવ સહિત 4 પર 270.8 કરોડનો દંડ, 127 કિલોથી વધુ સોનાની કથિત તસ્કરીનો ખુલાસો