રાજકોટ જિલ્લાના જસદણ તાલુકા અંતર્ગત આવતા જંગવડ ગામેથી એક અત્યંત આઘાતજનક અને દુઃખદ ઘટના સામે આવી છે. અહીં કુટુંબીજનો વચ્ચે જ કોઈ નજીવી બાબતે શરૂ થયેલી સામાન્ય બોલાચાલી અને માથાકૂટે ઉગ્ર સ્વરૂપ ધારણ કરી લીધું હતું, જે અંતે ખૂની હુમલામાં પલટાઈ જતાં સમગ્ર વિસ્તારમાં ભારે ચકચાર મચી ગઈ છે.
મહિલાની કરૂણ હત્યા અને પતિ ગંભીર રીતે ઇજાગ્રસ્ત
આ હિંસાત્મક ઝઘડા દરમિયાન વિલાશબેન પ્રકાશભાઈ ઘોડકીયા નામની પ્રૌઢ મહિલાને ગંભીર ઇજાઓ પહોંચી હતી. આ ઉપરાંત મૃતક મહિલાના પતિ પ્રકાશભાઈ ઘોડકીયાને પણ ગંભીર ઇજાઓ થતા તાત્કાલિક ધોરણે સારવાર અર્થે આટકોટની કેડીપી હોસ્પિટલ ખાતે ખસેડવામાં આવ્યા હતા. જોકે, હોસ્પિટલ ખાતે ફરજ પરના તબીબોએ વિલાશબેનને તપાસીને મૃત જાહેર કર્યા હતા, જેના કારણે પરિવારમાં શોકનું મોજુ ફરી વળ્યું છે.

