વાવ-થરાદના રાહ તાલુકાના બેવટા ગામની સીમમાં SOGએ ખાનગી બાતમીના આધારે મોટી કાર્યવાહી કરી છે. રહેણાંક મકાનમાં દરોડો પાડીને પોલીસે 1.497 કિલો અફીણનો જથ્થો ઝડપી પાડ્યો છે. જપ્ત કરાયેલા અફીણની કિંમત 7.48 લાખ હોવાનું સામે આવ્યું છે.
SOGની ટીમે મળેલી બાતમીના આધારે બેવટા ગામના રહેણાંક મકાનમાં તપાસ હાથ ધરી હતી. દરમિયાન લોખંડના પટારામાંથી અફીણનો જથ્થો મળી આવ્યો હતો. પોલીસે સ્થળ પરથી અફીણનો જથ્થો કબજે કરી આગળની કાર્યવાહી હાથ ધરી હતી.
આ કાર્યવાહીમાં બેવટા ગામના ભુપાજી રાજપુત નામના શખ્સને ઝડપી લેવામાં આવ્યો છે. પોલીસે તેની સામે નશીલા પદાર્થોના ગેરકાયદે કબજા અને સંબંધીત કાયદાકીય જોગવાઈઓ હેઠળ કાર્યવાહી શરૂ કરી છે.
પોલીસે અફીણ સહિત કુલ 7.53 લાખનો મુદ્દામાલ જપ્ત કર્યો છે. જેમાં 1.497 કિલો અફીણની અંદાજિત કિંમત 7.48 લાખ હોવાનું જણાવાયું છે. બાકીના મુદ્દામાલ અંગે પોલીસ દ્વારા વધુ વિગતો મેળવવામાં આવી રહી છે.
સમગ્ર મામલે થરાદ પોલીસ મથકે NDPS એક્ટ હેઠળ ગુનો નોંધવામાં આવ્યો છે. થરાદ પોલીસે આરોપીની પૂછપરછ સહિતની કાર્યવાહી હાથ ધરી છે. અફીણ ક્યાંથી લાવવામાં આવ્યું હતું અને તેને ક્યાં પહોંચાડવાનું હતું તે સહિતની બાબતો અંગે તપાસ ચાલી રહી છે.
SOGની કાર્યવાહી બાદ હવે પોલીસ તપાસનો વ્યાપ વધારવામાં આવ્યો છે. જપ્ત કરાયેલો અફીણનો જથ્થો કોની પાસેથી મેળવાયો હતો, તેને આગળ કોને આપવાનો હતો અને આ સમગ્ર મામલે અન્ય કોઈ વ્યક્તિ સંડોવાયેલી છે કે કેમ તે દિશામાં તપાસ કરવામાં આવી રહી છે.