સુરેન્દ્રનગર જિલ્લામાં ખનીજ માફિયાઓ સામે વહીવટી તંત્ર દ્વારા આક્રમક કાર્યવાહી હાથ ધરવામાં આવી છે. સુરેન્દ્રનગર જિલ્લામાં ચાલી રહેલા કાર્બોસેલ ખનીજના ગેરકાયદે ખનનને ડામવા માટે ખાણ ખનીજ વિભાગ અને પોલીસની ટીમે સંયુક્ત રીતે સપાટો બોલાવ્યો છે. બે અલગ-અલગ તાલુકાના વિવિધ વિસ્તારોમાં અચાનક દરોડા પાડીને મોટા પાયે ચાલતું ગેરકાયદે ખનન પકડી પાડવામાં આવ્યું છે.
આ સંયુક્ત ઓપરેશન દરમિયાન સાયલા તાલુકાના ચોરવીરા અને ખાખરાળી ગામે મોટાપાયે ગેરકાયદે ખનન ઝડપાયું હતું.
ચોરવીરા ગામ: અહીં તપાસ કરતા 11 કૂવાઓમાંથી ગેરકાયદે ખનન થતું હોવાનું સામે આવ્યું હતું. આ પ્રકરણમાં સાબડિયા લાલજીભાઈ ધનાભાઈ દ્વારા ખનન કરાવાતું હોવાનો ખુલાસો થયો છે અને પોલીસે આશરે રૂપિયા 35 લાખનો મુદ્દામાલ જપ્ત કર્યો છે.
ખાખરાળી ગામ: ચોપાટ વિસ્તારમાં આવેલ 7 કૂવાઓમાંથી ગેરકાયદેસર ખનન ઝડપી પાડવામાં આવ્યું હતું, જેમાંથી બે ટ્રેક્ટર અને જનરેટર સહિત કુલ રૂપિયા 50 લાખની સામગ્રી કબજે કરવામાં આવી છે.
સાયલા ઉપરાંત થાનગઢ તાલુકાના જામવાળી ગામે પણ તંત્ર દ્વારા સઘન તપાસ હાથ ધરવામાં આવી હતી. જામવાળી ગામે મુની દેવળ મંદિર પાછળના વિસ્તારમાં અંદાજે 20 કૂવાઓમાં ગેરકાયદેસર રીતે કાર્બોસેલનું ખનન ચાલી રહ્યું હોવાનું માલૂમ પડ્યું હતું. આ સ્થળેથી પણ રૂપિયા 25 લાખનો મુદ્દામાલ જપ્ત કરવામાં આવ્યો છે. ત્રણેય સ્થળો મળીને કુલ 37 કૂવાઓમાંથી ગેરકાયદે ખનન પકડીને કુલ આશરે રૂપિયા 1.10 કરોડનો મુદ્દામાલ જપ્ત કરાયો છે.
તંત્ર દ્વારા તમામ ગેરકાયદે ખનન સ્થળો પર જીપીએસ કોર્ડિનેટ સાથે સચોટ માપણીની કામગીરી શરૂ કરવામાં આવી છે. માઇનર્સ એક્ટ-1957 હેઠળ કસૂરવાર ઇસમો સામે પોલીસ ફરિયાદ નોંધવાની સાથેસાથે ભારે દંડનીય કાર્યવાહી પણ હાથ ધરવામાં આવી છે, જેનાથી ખનીજ માફિયાઓમાં ભારે ફફડાટ ફેલાઈ ગયો છે.
આ પણ વાંચો: Surendranagar News: લખતરમાં ગાંધી જયંતી નિમિત્તે ગ્રામ સભા યોજાઈ, વિકાસના મુદ્દાઓ પર થઈ ચર્ચા