લખતર ગ્રામ પંચાયત મીટીંગ હોલ ખાતે 2 ઓક્ટોબરના રોજ ગાંધી જયંતીના અવસરે વિશેષ ગ્રામ સભાનું આયોજન કરવામાં આવ્યું હતું. લખતર ગ્રામ પંચાયતના ઇન્ચાર્જ મહિલા સરપંચ હીરાબેન વડોદરિયાના અધ્યક્ષ સ્થાને આ બેઠક મળી હતી, જેમાં ગામના વિકાસ અને પડતર પ્રશ્નો અંગે વિસ્તૃત ચર્ચાઓ કરવામાં આવી હતી.
એજન્ડા અને પંચાયતના વિકાસ કાર્યોની ચર્ચા
બેઠકની શરૂઆતમાં લખતરના તલાટી હરેશભાઇ ચૌધરી દ્વારા એજન્ડા રજૂ કરવામાં આવ્યો હતો. જેમાં ગત મિટિંગની કાર્યવાહીની સમીક્ષા, ખર્ચ બિલને મંજૂરી આપવી, આવેલા અરજીઓનું વાચન અને પંચાયતમાં મંજૂર થયેલા વિકાસના કામો બાબતે ચર્ચા કરાઈ હતી. આ ઉપરાંત બાળવિવાહ મુક્ત ભારત અભિયાનના ઠરાવો, બાલિકા પંચાયત, મહિલા બાળ સુરક્ષા, નવીન રોજગાર અધિનિયમની અમલવારી અને માર્ગ સલામતી જેવા મહત્વના મુદ્દાઓ પર પણ વિશેષ ભાર મૂકવામાં આવ્યો હતો.
