દાહોદ જિલ્લાના દેવગઢ બારિયા તાલુકામાં ખેડૂતો માટે આવશ્યક એવા DAP ખાતરની ગેરરીતિ અને કાળાબજારી સામે જિલ્લા તંત્રે લાલઆંખ કરી મોટી કાર્યવાહી હાથ ધરી છે.દેવગઢ બારિયાના મેન્દરા ગામે આવેલા એક ખાનગી ગોડાઉન પર જિલ્લા કક્ષાના અધિકારીઓની ટીમે સરપ્રાઈઝ રેડ પાડીને સહકારી મંડળીના ખાતરનો મોટો જથ્થો જપ્ત કર્યો છે.

ખાતરની કુલ 400 જેટલી થેલીઓ મળી આવી

મળતી વિગતો અનુસાર, સહકારી મંડળી સાથે સંકળાયેલા ઈસ્માઈલ બાજી નામના વ્યક્તિ દ્વારા દેવગઢ બારિયા સહકારી મંડળીનો DAP ખાતરનો મોટો જથ્થો બારોબાર અન્ય એક શંકાસ્પદ ખાનગી ગોડાઉનમાં ખસેડવામાં આવ્યો હોવાની ગુપ્ત બાતમી જિલ્લા તંત્રને મળી હતી.બાતમીના આધારે જિલ્લા કક્ષાના ઉચ્ચ અધિકારીઓની ટીમે તાત્કાલિક મેન્દરા ગામે આવેલા સ્થળ પર દરોડો પાડ્યો હતો.અધિકારીઓની ટીમે સ્થળ પર તપાસ હાથ ધરતાં ગોડાઉનમાં ગેરકાયદેસર રીતે રાખવામાં આવેલી DAP ખાતરની કુલ 400 જેટલી થેલીઓ મળી આવી હતી. 

કાળાબજારી કરનારા તત્વોમાં ફાફડાટ

સહકારી મંડળીનું ખાતર ખેડૂતો સુધી પહોંચવાને બદલે ખાનગી ગોડાઉનમાં મળી આવતા તંત્રે સ્થળ પર જ તમામ જથ્થો જપ્ત કરી ગોડાઉનને સીલ કરી દીધું છે. ચોમાસાની સીઝનમાં ખેડૂતો માટે ખાતર અત્યંત મહત્વનું હોય છે, ત્યારે સહકારી મંડળીના ખાતરની બારોબાર હેરાફેરી અને કાળાબજારીના આ કૌભાંડ સામે જિલ્લા તંત્રની સીધી અને કડક કાર્યવાહીથી ગેરરીતિ આચરતા તત્વોમાં ભારે ફાફડાટ વ્યાપી ગયો છે. હાલમાં તંત્ર દ્વારા ગોડાઉન સીલ કરીને આ મામલે કાયદેસરની આગળની તપાસ અને ગુનો નોંધવાની તજવીજ તેજ કરવામાં આવી છે.

આ પણ વાંચોઃ Ahmedabad News: દુષ્કર્મ કેસમાં દોષિત પિયુષ જેઠવાને કોર્ટે 20 વર્ષની કેદની સજા ફટકારી