ઝાલોદમાં એક એવી ચોંકાવનારી છેતરપિંડીની ઘટના સામે આવી છે, જેણે સમગ્ર પંથકના ખેડૂતો અને વાહન ચાલકોને સ્તબ્ધ કરી દીધા છે. છેલ્લા કેટલાક સમયથી ગુજરાતના સરહદી વિસ્તારોમાં સોલાર પ્લાન્ટના સરકારી અને પ્રાઇવેટ પ્રોજેક્ટ ચાલી રહ્યા છે, જેનો ફાયદો ઉઠાવીને એક શાતિર ઠગ ટોળકી ઝાલોદ પંથકમાં સક્રિય થઈ હતી. આ ટોળકીના સભ્યોએ પોતાને એક મોટી સોલાર કંપનીના પ્રતિનિધિ અને કોન્ટ્રાક્ટર તરીકે ઓળખાવી સ્થાનિક ખેડૂતોનો સંપર્ક સાધ્યો હતો.

13 ટ્રેક્ટર અને કિંમતી ગાડીઓ ઉપાડી ગયા

આરોપીઓએ ખેડૂતોને લાલચ આપી હતી કે તેમના સોલાર સાઇટના કામકાજ, માટીકામ અને મજૂરોના વહન માટે મોટા પાયે વાહનોની જરૂર છે. જો ખેડૂતો પોતાના ટ્રેક્ટર અને અન્ય વાહનો કંપનીમાં ભાડે આપશે, તો તેમને બજાર ભાવ કરતાં ઘણું ઊંચું અને આકર્ષક માસિક ભાડું ચૂકવવામાં આવશે. શરૂઆતમાં વિશ્વાસ જીતવા માટે કાગળ પર કરારો પણ કરવામાં આવ્યા હતા. આ માયાજાળમાં ફસાઈને ઝાલોદના અલગ-અલગ ગામના ખેડૂતોએ પોતાના કિંમતી એવા ૧૩ ટ્રેક્ટરો, 1 તુફાન ક્રૂઝર અને 1 બોલેરો પિકઅપ ગાડી મળી કુલ 15 વાહનો આ કથિત સોલાર કંપનીને સોંપી દીધા હતા.

મોબાઈલ બંધ અને ઓફિસને તાળાં, પોલીસ દોડી

વાહનોનો કબ્જો મેળવ્યા બાદ થોડા દિવસો સુધી બધું બરાબર ચાલ્યું હતું, પરંતુ જ્યારે પ્રથમ માસનું ભાડું ચૂકવવાનો સમય આવ્યો ત્યારે કંપનીના કહેવાતા અધિકારીઓએ વાયદાઓ કરવાના શરૂ કર્યા હતા. આખરે તમામ આરોપીઓ પોતાના મોબાઈલ ફોન સ્વીચ ઓફ કરીને અને ભાડાની ઓફિસને તાળાં મારીને ₹૧ કરોડથી વધુની કિંમતના 15 વાહનો લઈને રાતોરાત ફરાર થઈ ગયા હતા. ખેડૂતોએ જ્યારે તપાસ કરી ત્યારે ખબર પડી કે આવી કોઈ સોલાર કંપની લોકેશન પર અસ્તિત્વમાં જ નહોતી. ભોગ બનનાર ખેડૂતો ન્યાયની આશાએ ઝાલોદ પોલીસ સ્ટેશન પહોંચ્યા છે. પોલીસે કલેક્ટ કરેલા સીસીટીવી અને દસ્તાવેજોના આધારે આ ગેંગ આંતરરાજ્ય હોવાનું અને વાહનોને એમપી કે રાજસ્થાન સરહદે બારોબાર વેચી દેવાયા હોવાની શંકા સાથે નાકાબંધી અને તપાસના ચક્રો ગતિમાન કર્યા છે.

આ પણ વાંચો: Ahmedabad: એસ.જી. હાઈવે પર ટ્રાફિક પોલીસનો રૂપિયા લેતો વીડિયો વાયરલ, ગાડીનું લોક ખોલવા સરેઆમ લાંચ લીધી