ગુજરાતના વાતાવરણમાં મોટો પલટો આવ્યો છે અને બે અલગ-અલગ ભૌગોલિક છેડા પર મેઘરાજા મન મૂકીને વરસી રહ્યા છે. મધ્ય ગુજરાતના આદિવાસી અને ડુંગરાળ વસતિ ધરાવતા મહીસાગર જિલ્લામાં મોડી રાતથી જ કાળાડિબાંગ વાદળો ઘેરાયા હતા. જિલ્લાના મુખ્ય મથક લુણાવાડા સહિત ખાનપુર અને કડાણા તાલુકામાં ધોધમાર વરસાદ નોંધાયો છે. આ ઉપરાંત સંતરામપુર તાલુકા પંથકમાં પણ સારો વરસાદ થવાના અહેવાલો છે. મહીસાગરમાં આ વરસાદી રાઉન્ડ ખેતી માટે અત્યંત આશીર્વાદરૂપ માનવામાં આવે છે, કારણ કે આ વિસ્તારોમાં મોટાભાગની ખેતી વરસાદ આધારિત છે.
ધાનેરાની રેલ નદીમાં નવા નીરના પૂર
બીજી તરફ, ઉત્તર ગુજરાતના સરહદી અને મોટેભાગે ઓછો વરસાદ મેળવતા બનાસકાંઠા જિલ્લાના ધાનેરા પંથકમાં મેઘરાજાએ રૌદ્ર અને નયનરમ્ય એન્ટ્રી કરી છે. ધાનેરા શહેર અને આસપાસના ગ્રામ્ય વિસ્તારો જેવા કે બાપલા અને વાછોલમાં પ્રથમ રાઉન્ડમાં જ મુશળધાર વરસાદ ખાબક્યો છે. આ પ્રથમ વરસાદની સાથે જ પંથકના સૂકાભઠ નદી-નાળા અને ગ્રામીણ વહોળાંઓ ફરીથી જીવંત બની ગયા છે. સૌથી મહત્વના સમાચાર એ છે કે, ઉપરવાસમાં થયેલા ભારે વરસાદને કારણે ધાનેરાની ઓળખ સમાન રાજોડા તરફ વહેતી રેલ નદીમાં પાણીની જોરદાર આવક થઈ છે. નદીમાં નવા નીર વહેતા થતાં સ્થાનિક લોકો નદીના દર્શન કરવા ઉમટી પડ્યા હતા.