વિક્રમ સંવતના નૂતન વર્ષના મંગલ પ્રારંભ સાથે જ સુપ્રસિદ્ધ યાત્રાધામ અને ચાર ધામ પૈકીના એક એવા દ્વારકા તીર્થક્ષેત્રમાં શ્રદ્ધા અને ભક્તિનો અભૂતપૂર્વ માહોલ સર્જાયો છે. નવા વર્ષના પ્રથમ દિવસે રાજાધિરાજ શ્રી દ્વારકાધીશના ચરણોમાં શીશ ઝુકાવી પોતાના આગામી વર્ષની સુખ, શાંતિ અને સમૃદ્ધિની પ્રાર્થના કરવા માટે દેશભરમાંથી હજારોની સંખ્યામાં ભાવિકો દ્વારકા નગરીમાં ઉમટી પડ્યા છે. જગત મંદિર તરફ જતા તમામ મુખ્ય માર્ગો, ગોમતી ઘાટ અને ઐતિહાસિક બજારો માનવ મહેરામણથી છલકાઈ ઊઠ્યા છે. 'જય દ્વારકાધીશ'ના ગગનભેદી જયઘોષથી સમગ્ર મંદિર પરિસર અને દ્વારકા નગરી ભક્તિના રંગે રંગાઈ ગઈ છે.
દિવાળી વેકેશનથી પ્રવાસનમાં મોટો ઉછાળો
સવારની મંગળા આરતીથી જ ભક્તોની લાંબી કતારો જોવા મળી રહી છે. મંદિર પરિસર સહિત શહેરના તમામ રસ્તાઓ પર ભક્તોની સતત અવરજવરથી ટ્રાફિક અને સુરક્ષા વ્યવસ્થા ચુસ્ત કરવામાં આવી છે. નવા વર્ષની રજાઓ અને શાળા-કોલેજોના દિવાળી વેકેશનને પગલે માત્ર જગત મંદિર જ નહીં, પરંતુ બેટ દ્વારકા, શિવરાજપુર બીચ, નાગેશ્વર જ્યોતિર્લિંગ અને રૂક્ષ્મણી મંદિર જેવા આસપાસના તમામ ધાર્મિક અને પ્રવાસન સ્થળોએ પણ આગામી દિવસોમાં પ્રવાસીઓનો જબરદસ્ત ધસારો રહેવાની પૂરી સંભાવના છે.