દેવભૂમિ દ્વારકા જિલ્લાના મુખ્ય મથક જામ ખંભાળિયામાંથી એક મોટી દુર્ઘટનાના સમાચાર સામે આવ્યા છે. ખંભાળિયા GIDC વિસ્તારમાં આવેલા 'કેતન એન્ટરપ્રાઇઝ' નામના ભંગારના ગોડાઉનમાં અચાનક જ ભીષણ આગ ભભૂકી ઉઠી હતી. ગોડાઉનમાં રહેલો ભંગાર અને જ્વલનશીલ સામગ્રીના કારણે આગે થોડી જ વારમાં અત્યંત વિકરાળ સ્વરૂપ ધારણ કરી લીધું હતું.
આગના કારણે આકાશમાં ધુમાડાના કાળાં ગોટેગોટા દૂર-દૂર સુધી જોવા મળ્યા હતા, જેને લઈને આસપાસના વિસ્તારમાં ભારે ભય અને કુતૂહલનું વાતાવરણ સર્જાયું હતું અને લોકોના ટોળા એકઠા થઈ ગયા હતા.
https://www.instagram.com/reel/DfmvL3_FPvv/?utm_source=ig_web_copy_link&srtk=MzRlODBiNWFlZA==
ઘટનાની ગંભીરતાને ધ્યાનમાં રાખીને તંત્ર તાત્કાલિક હરકતમાં આવ્યું હતું. સ્થળ પર 3 થી વધુ ફાયર ફાઇટર ગાડીઓ અને 2 પાણીના ટેન્કરો તાત્કાલિક દોડી આવ્યા હતા. ફાયર વિભાગના બહાદુર જવાનો અને સ્થાનિક લોકો દ્વારા સતત પાણીનો મારો ચલાવીને આગ પર કાબૂ મેળવવા માટે યુદ્ધના ધોરણે સઘન પ્રયાસો હાથ ધરવામાં આવ્યા હતા.
આ વિકરાળ આગના કારણે ગોડાઉનમાં રહેલો મોટા ભાગનો ભંગાર અને માલસામાન બળીને સંપૂર્ણપણે ભસ્મ થઈ ગયો છે, જેનાથી મોટું આર્થિક નુકસાન થયું હોવાની આશંકા છે. નુકસાનના આંકડા અને આગ લાગવાનું ચોક્કસ કારણે તપાસ બાદ સામે આવે તેવી શક્યતા છે.
