ગોંડલ પાસે આવેલી જામવાડી જીઆઇડીસી (GIDC) જાણે નકલી અને ભેળસેળયુક્ત ખાદ્યપદાર્થોનું હબ બની ગઈ હોય તેમ ફૂડ એન્ડ ડ્રગ્સ વિભાગની કાર્યવાહીમાં એક પછી એક મોટા ખુલાસા થઈ રહ્યા છે. ડેપ્યુટી કમિશનરની સૂચના હેઠળ ફૂડ ઇન્સ્પેક્ટરોની સ્પેશિયલ ટીમે ગુપ્ત બાતમીના આધારે જામવાડી જીઆઇડીસીમાં આવેલી 'મિસરી સ્પાઈસીસ' નામની કંપની પર અચાનક દરોડા પાડ્યા હતા. આ સર્ચ ઓપરેશન દરમિયાન અધિકારીઓ પણ ફેક્ટરીની અંદરનો નજારો અને મસાલાનો વિશાળ જથ્થો જોઈને ચોંકી ઉઠ્યા હતા.
79 હજાર કિલોથી વધુનો માલ જપ્ત, નમૂના લેબમાં મોકલાયા
ફૂડ વિભાગની ટીમે ફેક્ટરી પરિસરમાંથી અલગ-અલગ બ્રાન્ડ અને ગુણવત્તાના કુલ ૭૯,૯૦૦ કિલો મસાલા અને જુદા-જુદા લોટનો જથ્થો શોધી કાઢ્યો હતો, જેની બજાર કિંમત આશરે ૧.૯૦ કરોડ રૂપિયા થવા જાય છે. અધિકારીઓના જણાવ્યા મુજબ, અહીં શુદ્ધ મસાલાના નામે ગ્રાહકોને છેતરવા માટે મરચા પાવડર, ધાણા પાવડર અને હળદરમાં સસ્તો ચોખાનો લોટ, મકાઈનો લોટ તેમજ હલકી કક્ષાનું પામતેલ ભેળવવામાં આવતું હોવાની પ્રબળ આશંકા છે. આથી, ટીમે કાયદાકીય પ્રોટોકોલ મુજબ તમામ મસાલા અને લોટના નમૂનાઓ (Samples) સીલ કરીને તાત્કાલિક પરીક્ષણ માટે સરકારી લેબોરેટરીમાં મોકલી આપ્યા છે.
