ગોંડલ શહેરમાં મહિલાઓ અને યુવતીઓની સુરક્ષા પ્રત્યે પોલીસ પ્રશાસન કેટલું ગંભીર છે તેનો જીવતોજાગતો પુરાવો ગોંડલ ‘એ’ ડિવિઝન પોલીસે પૂરો પાડ્યો છે. શહેરના વ્યસ્ત ગણાતા આઈકોનિક રોડ પરથી બે યુવતીઓ બજારમાંથી ખરીદી કરીને પોતાના ઘરે પરત ફરી રહી હતી. આ દરમિયાન ગોંડલના જ રાજનગર વિસ્તારમાં રહેતો 30 વર્ષીય કુલદીપ ભરતભાઈ પટોડિયા નામનો શખ્સ પોતાની એક્ટિવા લઈને તેમની પાછળ પડી ગયો હતો. આ રોમિયોએ ગુલમહોર રોડ સુધી યુવતીઓનો પીછો ચાલુ રાખ્યો હતો અને ચાલુ વાહને જ યુવતીઓ તરફ જોઈને અશ્લીલ ઈશારા કરવા સહિત બિભત્સ અવાજો કાઢી હેરાન પરેશાન કરી મૂકી હતી.

પરિવાર અને પોલીસનું ત્વરિત કદમ

આવારા તત્વની આ હરકતથી ગભરાઈ જવાને બદલે યુવતીઓએ હિંમત દાખવી હતી અને ઘરે પહોંચીને તુરંત જ પોતાના વાલીઓને આ અંગે વિગતવાર વાત કરી હતી. દીકરીઓની સુરક્ષા જોખમાતા પરિવારે પણ સેજ પણ સમય બગાડ્યા વિના સીધા ગોંડલ ‘એ’ ડિવિઝન પોલીસ સ્ટેશનનો સંપર્ક સાધ્યો હતો અને કાયદેસરની ફરિયાદ નોંધાવી હતી. મહિલા ઉત્પીડન અને છેડતીના કેસની ગંભીરતા સમજીને પીઆઈ સહિતની ટીમે તાત્કાલિક અલગ-અલગ રૂટના સીસીટીવી (CCTV) કેમેરા ચેક કર્યા હતા. ફૂટેજમાં એક્ટિવા નંબર ટ્રેક થતાં જ પોલીસે ગણતરીના કલાકોમાં આરોપી કુલદીપ પટોડિયાને તેના ઘરેથી દબોચી લીધો હતો અને તેનું વાહન જપ્ત કર્યું હતું.

ઘટનાસ્થળે પાઠ ભણાવ્યો

આરોપીની ધરપકડ કર્યા બાદ પોલીસે સામાન્ય પ્રક્રિયા કરવાને બદલે તેને કાયદાનો સાચો ભય બતાવવાનું નક્કી કર્યું હતું. ‘એ’ ડિવિઝન પોલીસની ટીમ આરોપી કુલદીપને જાહેરમાં એ જ ગુલમહોર રોડ સ્થિત ઘટનાસ્થળે લઈ ગઈ હતી જ્યાં તેણે યુવતીઓની છેડતી કરી હતી. ત્યાં સ્થાનિક લોકોની હાજરીમાં સમગ્ર ગુનાહિત ઘટનાનું રી-કન્સ્ટ્રક્શન કરાવવામાં આવ્યું હતું કે તેણે કઈ રીતે પીછો કર્યો હતો અને શું ચેષ્ટાઓ કરી હતી. પોલીસની આ સિંગમ સ્ટાઈલ કામગીરી જોઈને સ્થાનિક રહીશો અને વેપારીઓએ પોલીસ પ્રોટોકોલને બિરદાવ્યો હતો. આ એક્શન બાદ ગોંડલના બજારો અને આસપાસના વિસ્તારોમાં રોડસાઇડ રોમિયોગીરી કરતા તત્વોમાં ફફડાટ વ્યાપી ગયો છે.

આ પણ વાંચો: Vadodara: દશરથ બ્રિજ પર કાળમુખું ડમ્પર ટકરાયું, નોકરીએ જતા મહિલા મોપેડ ચાલકનું ઘટનાસ્થળે જ કમકમાટીભર્યું મોત