ઉત્તર ગુજરાતના લાખો પશુપાલકોની જીવાદોરી સમાન અને એશિયાની અગ્રણી ડેરીઓમાં સ્થાન ધરાવતી સાબરકાંઠા ડિસ્ટ્રિક્ટ કો-ઓપરેટિવ મિલ્ક પ્રોડ્યુસર્સ યુનિયન લિમિટેડ (સાબરડેરી) ના ચેરમેન અને વાઇસ ચેરમેનની ચૂંટણીને લઈને રાજકીય ગરમાવો ચરમસીમાએ પહોંચી ગયો છે. ગતરોજ ભાજપના નિરીક્ષકો દ્વારા સાબરડેરીના નવા હોદ્દેદારોની પસંદગી માટે તમામ ડિરેક્ટરોની સેન્સ લેવામાં આવી હતી. જોકે, સેન્સ પ્રક્રિયા પૂર્ણ થયા બાદ પણ કોઈપણ એક નામ પર સર્વાનુમતે મહોર ન લાગતાં મામલો ગૂંચવાયો છે. ચેરમેન અને વાઈસ ચેરમેન બંને પદો માટે એકથી વધુ પ્રબળ દાવેદારો મેદાનમાં હોવાથી સર્જાયેલી ભારે ખેંચતાણ વચ્ચે આજે તમામ નિયામક મંડળ (બોર્ડ ઓફ ડિરેક્ટર્સ) ને તાત્કાલિક ગાંધીનગર ખાતે બોલાવવામાં આવ્યા છે. ગાંધીનગરથી આવેલા આ તેડાંને પગલે સાબરકાંઠા અને અરવલ્લી સહિત સમગ્ર રાજ્યના સહકારી રાજકારણમાં ભારે ખળભળાટ મચી ગયો છે.
ચેરમેન પદે 4 અને વાઇસ ચેરમેન પદે 3 નામોની રેસ (દાવેદારોની યાદી)
સાબરડેરીના સર્વોચ્ચ પદો પર કબ્જો જમાવવા માટે સહકારી ક્ષેત્રના દિગ્ગજ આગેવાનો વચ્ચે જોરદાર લોબિંગ ચાલી રહ્યું છે.ચેરમેન પદ માટે 4 પ્રબળ દાવેદારો,જેઠાભાઈ પટેલ પૂર્વ ચેરમેન અને ડેરીના સહકારી રાજકારણના જૂના જોગી.વિપુલ પટેલ સંગઠન અને ડિરેક્ટરોમાં મજબૂત પકડ ધરાવતો ચહેરો.ભોગીલાલ પટેલ સ્થાનિક સહકારી નેટવર્કમાં સક્રિય આગેવાન.મણીભાઈ પટેલ વરિષ્ઠ ડિરેક્ટર તરીકે દાવેદારીમાં આગળ.