જામનગર જિલ્લાના લાલપુર પંથકમાંથી કાયદો અને વ્યવસ્થાની સ્થિતિ પર સવાલ ઉઠાવતી એક અત્યંત ચકચારી ઘટના સામે આવી છે. વીજ કંપની (GEB) માંથી નિવૃત્ત થયેલા વરિષ્ઠ કર્મચારી મનસુખભાઈ વાછાણીની અજાણ્યા શખ્સો દ્વારા ઘાતકી હત્યા કરવામાં આવતાં સમગ્ર વિસ્તારમાં ભારે અરેરાટી અને ભયનો માહોલ ફેલાઈ ગયો છે. પ્રાથમિક તપાસમાં લૂંટના ઇરાદે આ હત્યાને અંજામ આપવામાં આવ્યો હોવાની પ્રબળ આશંકા સેવાઈ રહી છે. બનાવની જાણ થતાં જ ઉચ્ચ પોલીસ અધિકારીઓ સહિતનો મોટો કાફલો ઘટનાસ્થળે દોડી ગયો હતો અને હત્યારાઓનું પગેરું મેળવવા કવાયત હાથ ધરી છે.
અજાણ્યા શખ્સો હત્યા કરી ફરાર, લૂંટના ઇરાદાની આશંકા
લાલપુરમાં બનેલી આ ઘટનાની પ્રાપ્ત વિગતો અનુસારGEB ના નિવૃત્ત કર્મચારી મનસુખભાઈ વાછાણી પોતાના નિવાસસ્થાને હતા તે દરમિયાન અજાણ્યા શખ્સો ત્યાં ત્રાટક્યા હતા.અજાણ્યા હુમલાખોરોએ મનસુખભાઈ પર જીવલેણ હુમલો કરી તેમને મોતને ઘાટ ઉતારી દીધા હતા અને ઘટનાસ્થળેથી નાસી છૂટ્યા હતા.ઘરમાં થયેલી ઉથલપાથલ અને પ્રાથમિક સ્થિતિ જોતાં લૂંટ કરવાના બદઇરાદે ઘરમાં પ્રવેશેલા શખ્સોએ પ્રતિકાર થતાં અથવા ઓળખાઈ જવાના ડરે હત્યા કરી હોવાની શક્યતા વ્યક્ત કરવામાં આવી રહી છે.
ASP સહિતનો પોલીસ કાફલો ઘટનાસ્થળે પહોંચ્યો
નિવૃત્ત અધિકારીની હત્યાની ગંભીરતાને ધ્યાનમાં રાખીને પોલીસ તંત્ર તાબડતોબ હરકતમાં આવ્યું હતું.ઘટનાની જાણ થતાં જ મદદનીશ પોલીસ અધિક્ષક (ASP) સહિત લાલપુર પોલીસ અને ક્રાઈમ બ્રાન્ચની ટીમો તાત્કાલિક સ્થળ પર પહોંચી ગઈ હતી.પોલીસે ઘટનાસ્થળને કોર્ડન કરી પુરાવા નષ્ટ ન થાય તે માટે જરૂરી સુરક્ષા ગોઠવી દીધી છે.ફોરેન્સિક સાયન્સ લેબોરેટરી (FSL) અને ફિંગરપ્રિન્ટ નિષ્ણાતોની ટીમને પણ ઘટનાસ્થળે બોલાવીને મહત્વના પુરાવા એકત્ર કરવાની કામગીરી શરૂ કરવામાં આવી છે.
CCTV અને ટેકનિકલ કડીઓના આધારે તપાસ તેજ
હત્યારાઓને ઝડપી પાડવા માટે પોલીસે ચારેય તરફ નાકાબંધી કરી તપાસનો ધમધમાટ શરૂ કર્યો છે.બનાવ સ્થળ તથા આસપાસના મુખ્ય માર્ગો પર લાગેલા સીસીટીવી (CCTV) કેમેરાના ફૂટેજ ચકાસવામાં આવી રહ્યા છે, જેથી શકમંદ શખ્સોની અવરજવર અંગે માહિતી મળી શકે.આ ઉપરાંત સ્થાનિક બાતમીદારો અને હ્યુમન ઇન્ટેલિજન્સ તેમજ કોલ ડિટેઇલ્સના આધારે પણ કડીઓ જોડવામાં આવી રહી છે.પોલીસે મૃતદેહને પોસ્ટમોર્ટમ અર્થે ખસેડી હત્યાનો ગુનો નોંધવાની તજવીજ હાથ ધરી છે અને આરોપીઓને તાકીદે ઝડપી લેવા અલગ-અલગ ટીમો રવાના કરવામાં આવી છે.
આ પણ વાંચો: Surat: ખાડીઓનું ગળું ઘોંટતા દબાણો પર ચાલશે બુલડોઝર? કન્સલ્ટન્ટ એજન્સીના નવા સર્વે રિપોર્ટ પર સુરતીઓની મીટ
