ગુજરાતનું છોટી કાશી અને વિશ્વની રિફાઇનિંગ કેપિટલ ગણાતું જામનગર શહેર ફરી એકવાર વૈશ્વિક આંતરરાષ્ટ્રીય કક્ષાએ સુપરપાવર દેશો અને અબજોપતિઓના આકર્ષણનું કેન્દ્ર બન્યું છે. અમેરિકાના સેક્રેટરી ઓફ સ્ટેટ (વિદેશ મંત્રી) માર્કો રુબિયો એક અત્યંત શક્તિશાળી અને હાઈ-પ્રોફાઈલ આંતરરાષ્ટ્રીય ડેલિગેશન સાથે ખાસ વિમાન મારફતે જામનગર એરપોર્ટ ખાતે પહોંચ્યા છે. આ ડેલિગેશનમાં યુએસના ૨૦૦થી વધુ અગ્રણી ઉદ્યોગપતિઓ, બિઝનેસ સીઈઓ (CEOs) અને વરિષ્ઠ રાજદ્વારી પ્રતિનિધિઓ સામેલ છે. મુંબઈની સત્તાવાર મુલાકાત પૂર્ણ કરીને જામનગર એરફોર્સ સ્ટેશન ખાતે ઉતરાણ કર્યા બાદ, વિશાળ સુરક્ષા કાફલા સાથે આ વિદેશી મહેમાનો સીધા રિલાયન્સ ઇન્ડસ્ટ્રીઝ સંકુલ તરફ રવાના થયા હતા. આ ઐતિહાસિક મુલાકાત દરમિયાન ભારત અને અમેરિકા વચ્ચે વૈશ્વિક ઊર્જા સુરક્ષા અને ટેક્સાસમાં પ્રસ્તાવિત $300 બિલિયન (અંદાજે ₹25 લાખ કરોડથી વધુ) ના મેગા રિફાઇનરી પ્રોજેક્ટ ને આખરી ઓપ અપાય તેવી પ્રબળ શક્યતા છે.
મુકેશ અંબાણી સાથે હાઈ-લેવલ બેઠક
યુએસ સેક્રેટરી માર્કો રુબિયો અને બિઝનેસ પ્રતિનિધિઓ રિલાયન્સ ઇન્ડસ્ટ્રીઝના ચેરમેન મુકેશ અંબાણી તેમજ અંબાણી પરિવાર સાથે વિશેષ દ્વિપક્ષીય બેઠક યોજશે. જેમાં અમેરિકાના ટેક્સાસ રાજ્યમાં પ્રસ્તાવિત $300 બિલિયનના અલ્ટ્રા-મેગા રિફાઇનરી પ્રોજેક્ટની ભાગીદારી અંગે અંતિમ મહોર લાગી શકે છે. જામનગર સ્થિત રિલાયન્સ રિફાઇનરી પ્રતિદિન આશરે 14 લાખ બેરલ ક્રૂડ ઓઇલ રિફાઇન કરવાની અદભુત ક્ષમતા ધરાવે છે અને તે વિશ્વના સૌથી ભારે ક્રૂડને પણ શુદ્ધ કરી શકે છે. અમેરિકા ઈચ્છે છે કે રિલાયન્સ વેનેઝુએલામાંથી મોટા પાયે ક્રૂડ ઓઇલ આયાત કરે, જેથી વૈશ્વિક ઓઇલ સપ્લાય સંતુલિત રહે.20 થી 22 ઓક્ટોબર દરમિયાન યોજાયેલી આ ભારત મુલાકાત એવા સમયે થઈ રહી છે જ્યારે ભારત અને અમેરિકા વચ્ચેનો વેપાર કરાર આખરી તબક્કામાં છે.