ગુજરાતની શાન અને એશિયાભરમાં માત્ર જૂનાગઢના ગીરમાં જોવા મળતા એશિયાટિક સિંહોનો એક રોયલ વીડિયો હાલ વન્યજીવ પ્રેમીઓમાં ભારે આકર્ષણનું કેન્દ્ર બન્યો છે. સામાન્ય રીતે ચોમાસાની સીઝનમાં ગીર અભયારણ્ય પ્રવાસીઓ માટે વેકેશન પિરિયડ (બંધ) જાહેર કરતું હોય છે, જેથી જંગલની અંદર વાહનોની અવરજવર અને માનવ હાજરી નહિવત થઈ જાય છે. શાંત થયેલા આ જંગલમાં હવે વનરાજો પોતાની મસ્તીમાં રાજાશાહી ઠાઠથી ફરતા જોવા મળી રહ્યા છે.
જંગલના કાચા રસ્તા પર સિંહ દરબાર ભરાયો
સામે આવેલા અદભુત વીડિયોમાં જોઈ શકાય છે કે, વરસાદી ઝાપટાં બાદ ખીલેલી લીલીછમ વનરાજી વચ્ચે જંગલના એક કાચા રસ્તા પર ૪ થી ૫ સિંહોનું ટોળું એકઠું થયું છે. આ સિંહ પરિવાર રસ્તાની વચોવચ અત્યંત શાંતિથી બેઠેલો છે. કુદરતના ખોળે સર્જાયેલા આ અદભુત નજારામાં સિંહો એકબીજાના મોઢા ચાટીને અને ગેલ-ગમ્મત કરીને અગાધ વહાલ વરસાવી રહ્યા છે. સિંહોનો આવો માયાળુ અને શાંત અંદાજ બહુ ઓછી વાર કેમેરામાં કેદ થતો હોય છે.