ભરૂચ જિલ્લામાં લાંબી રાહ જોવડાવ્યા બાદ આખરે ચોમાસાએ બરાબરની જમાવટ કરી છે. જિલ્લા ડિઝાસ્ટર મેનેજમેન્ટના અહેવાલ મુજબ, અરબી સમુદ્રમાં સર્જાયેલી ભેજવાળી સિસ્ટમને કારણે ભરૂચના વાતાવરણમાં પલટો આવ્યો હતો અને ગત રાત્રિથી જ ગ્રામ્ય વિસ્તારોમાં મેઘ મહેર શરૂ થઈ ગઈ હતી.
હંસોટ અને નેત્રંગમાં ધીમીધારે ધોધમાર
ખાસ કરીને દરિયાકાંઠાના હંસોટ તાલુકા અને પહાડી તેમજ જંગલ વિસ્તાર ધરાવતા નેત્રંગ પંથકમાં મેઘરાજાએ મુકામ કર્યો છે. બંને તાલુકાઓમાં સવારના સમયે જ 1-1 ઇંચ જેટલો સાર્વત્રિક વરસાદ નોંધાયો છે. વરસાદના કારણે રસ્તાઓ પર પાણી ફરી વળ્યા હતા. આ વરસાદ કોઈ પણ પ્રકારના નુકસાન વગર પડ્યો હોવાથી સ્થાનિકોમાં આનંદનો માહોલ છે. ભરૂચ, અંકલેશ્વર અને ઝઘડિયાના ઔદ્યોગિક પંથકોમાં પણ હળવાથી મધ્યમ વરસાદી ઝાપટાં પડવાના કારણે પ્રદૂષિત વાતાવરણમાં મોટી રાહત મળી છે.