વડોદરાના વાઘોડિયા વિસ્તારમાં પાંચ દિવસ પહેલાં વેપારી પર જાહેરમાં થયેલા ફાયરિંગની ઘટનાએ સમગ્ર જિલ્લાની કાયદો અને વ્યવસ્થાની સ્થિતિ સામે સવાલો ઊભા કર્યા છે. આ મામલાની ગંભીરતાને જોતાં વડોદરા રેન્જ આઈજી અને જિલ્લા પોલીસ વડા દ્વારા સંયુક્ત તપાસના આદેશ આપવામાં આવ્યા છે. જોકે, હુમલાખોરો એટલા શાતિર નીકળ્યા કે પાંચ દિવસનો સમય વિતી જવા છતાં પોલીસ હજુ પણ અંધારામાં ફાંફા મારી રહી છે અને શૂટર્સનો કોઈ સગડ મળ્યો નથી.
ડેશકેમ ફૂટેજ હોવા છતાં ઓળખ અશક્ય બની
સૌથી ચોંકાવનારી બાબત એ છે કે જ્યારે આ ફાયરિંગની ઘટના બની ત્યારે નજીકમાંથી પસાર થતી એક કારના ડેશકેમમાં શૂટર્સના લાઈવ ફૂટેજ કેદ થઈ ગયા હતા. પરંતુ, શૂટર્સે ગુના સમયે પોતાના મોઢા માસ્કથી સંપૂર્ણ ઢાંકી રાખ્યા હોવાના લીધે ટેકનોલોજી હોવા છતાં તેમનો ચહેરો સ્પષ્ટ ઓળખી શકાતો નથી. આ સિવાય હુમલાખોરોએ જે મોટરસાયકલનો ઉપયોગ કર્યો હતો તેની નંબર પ્લેટની જ્યારે સર્ચ સિસ્ટમમાં તપાસ કરવામાં આવી ત્યારે તે નંબર પણ તદ્દન ખોટો અને બોગસ હોવાનું સામે આવ્યું છે, જેના કારણે વાહનના માલિક સુધી પહોંચવાના પોલીસના પ્રયાસો નિષ્ફળ રહ્યા છે.