લાખો શ્રદ્ધાળુઓની અતૂટ આસ્થા અને શ્રદ્ધાના કેન્દ્ર સમાન જૂનાગઢના ગિરનારની પવિત્ર લીલી પરિક્રમાનો આજથી ભવ્ય પ્રારંભ થયો છે. ગિરનારની પાવન ભૂમિ પર ભક્તિનો રંગ જામવા લાગ્યો છે અને સમગ્ર પરિક્રમા માર્ગ પર શ્રદ્ધા અને ભક્તિનો અનોખો માહોલ જોવા મળી રહ્યો છે. વહેલી સવારથી જ પરિક્રમાર્થીઓ ભારે ઉત્સાહ સાથે 'જય ગિરનારી'ના ગગનભેદી નાદ લગાવતા પરિક્રમાના રૂટ પર આગળ વધી રહ્યા છે.

પરિક્રમા માર્ગ પર આસ્થાનો મહાસાગર

ગિરનાર લીલી પરિક્રમાના ગ્રાઉન્ડ ઝીરો રિપોર્ટ મુજબ, રાજ્યના ખૂણેખૂણેથી આવેલા લાખો શ્રદ્ધાળુઓના કારણે ગિરનાર પરિક્રમા સ્થળ જાણે આસ્થાના મહાસાગરમાં ફેરવાઈ ગયું છે. ભજન, ભોજન અને ભક્તિના ત્રિવેણી સંગમ સમાન આ પરિક્રમામાં નાના બાળકોથી લઈને વૃદ્ધો સુધીના તમામ શ્રદ્ધાળુઓમાં અદભુત ઉત્સાહ જોવા મળી રહ્યો છે. સમગ્ર જંગલ વિસ્તાર અને પરિક્રમાના માર્ગો 'જય ગિરનારી'ના નાદથી ગુંજી ઉઠ્યા છે.

સુરક્ષા અને વ્યવસ્થા માટે 2,200 પોલીસ જવાનો તૈનાત

એક તરફ પરિક્રમા માર્ગ પર ભક્તોનું ઘોડાપૂર ઉમટ્યું છે, તો બીજી તરફ કોઈ અનિચ્છનીય ઘટના ન બને અને યાત્રાળુઓને કોઈ મુશ્કેલી ન પડે તે માટે પોલીસ અને વહીવટી તંત્ર સંપૂર્ણપણે સજ્જ બન્યું છે. પરિક્રમાના સમગ્ર રૂટ પર સુરક્ષા અને વ્યવસ્થા જાળવવા માટે ખાસ આયોજન કરવામાં આવ્યું છે, જે અંતર્ગત 2,200 પોલીસ જવાનોને ચુસ્ત બંદોબસ્તમાં તૈનાત કરવામાં આવ્યા છે. પોલીસ અને વહીવટી તંત્રની ટીમો દ્વારા સમગ્ર પરિક્રમા રૂટ પર સતત નિરીક્ષણ રાખવામાં આવી રહ્યું છે.

આ પણ વાંચો: Surat: પસંદગીના નંબર માટે સુરતીઓએ ખોલી તિજોરી; RTOમાં નવી WA સિરીઝના VIP નંબરોની હરાજીથી ₹76 લાખથી વધુની આવક