મધ્ય ગુજરાતના જીવાદોરી સમાન ચરોતર પંથકમાં ડાંગરની ખેતી કરતા ખેડૂતો માટે રાજ્ય સરકાર અને સિંચાઈ વિભાગ તરફથી મોટી ભેટ મળી છે. સામાન્ય રીતે ચોમાસાના પ્રારંભિક દિવસોમાં ખેડૂતો ડાંગરના ધરૂવાડિયા (ધરૂ) તૈયાર કરતા હોય છે, જેના માટે વિપુલ પ્રમાણમાં પાણીની જરૂરિયાત રહે છે. જોકે, ચાલુ સીઝનમાં મેઘરાજાએ શરૂઆતમાં હાથતાળી આપતાં ચરોતરના ખેડૂતોના જીવ અધ્ધર થઈ ગયા હતા અને મોંઘા ડાંગરના ધરૂ બળી જવાની અણી પર હતા.
ખેડૂતોની માગણી પર તંત્રનું ત્વરિત એક્શન
પરિસ્થિતિની ગંભીરતાને સમજીને ખેડા અને આણંદ જિલ્લાના ખેડૂત સંગઠનો દ્વારા સ્થાનિક સ્તરે અને સિંચાઈ વિભાગમાં વહેલું પાણી છોડવા માટે ઉગ્ર રજૂઆતો કરવામાં આવી હતી. આ મામલે સિંચાઈ સલાહકાર સમિતિની તાકીદની બેઠક મળી હતી, જેમાં પાકને બચાવવા માટે કડાણા ડેમમાંથી તાત્કાલિક પાણી છોડવાની સત્તાવાર ભલામણ કરાઈ હતી. સમિતિની મંજૂરી મળતાં જ વણાંકબોરી વિયર ખાતેથી મહી જમણા કાંઠા નહેર યોજના હેઠળ ૩,૫૦૦ ક્યુસેક પાણી વહેતું કરી દેવાયું છે.