ખેડા જિલ્લાના કપડવંજ પંથકમાં ગત 27 જૂનના રોજ એક ફેક્ટરીમાં થયેલા ભયાનક બ્લાસ્ટના કારણે સમગ્ર વિસ્તાર ધ્રુજી ઉઠ્યો હતો. વિસ્ફોટ એટલો પ્રચંડ હતો કે ફેક્ટરીનું માળખું વેરવિખેર થઈ ગયું હતું અને ત્યાં કામ કરતા બે મજૂરો આગની જ્વાળાઓમાં લપેટાઈને ગંભીર રીતે દાઝી ગયા હતા. આ અકસ્માતમાં ગંભીર ઇજા પામેલા એક શ્રમિકનું હોસ્પિટલમાં સારવાર દરમિયાન મોત નીપજતાં આ મામલો સદ માનવવધ અને બેદરકારીના ગંભીર ગુનામાં ફેરવાયો હતો. ઘટના બાદ સ્થાનિક પોલીસ અને ખેડા એસ.ઓ.જી.ની ટીમો તપાસમાં જોડાઈ હતી.
કપડવંજમાં કેમિકલ ફેક્ટરી બ્લાસ્ટ કેસ
https://twitter.com/sandeshnews/status/2075106113176100908
પરવાનગી વગર મોતનો ખેલ ખેલાતો હતો
પોલીસ અને ઇન્ડસ્ટ્રિયલ સેફ્ટી વિભાગની પ્રાથમિક તપાસમાં બહાર આવ્યું છે કે, ફેક્ટરીના માલિક મિતુલ પટેલે ફેક્ટરી એક્ટ, પ્રદૂષણ નિયંત્રણ બોર્ડ (GPCB) કે સ્થાનિક વહીવટી તંત્ર પાસેથી કોઈ પણ પ્રકારની કાયદેસરની મંજૂરીઓ મેળવી ન હતી. કોઈ પણ પ્રકારના સેફ્ટી ઓડિટ કે ફાયર સેફ્ટીના સાધનો વિના જ ફેક્ટરીમાં જોખમી કેમિકલ પ્રોસેસિંગ કરવામાં આવી રહ્યું હતું. બ્લાસ્ટ થયા બાદ પોલીસ કેસથી બચવા માટે માલિક મિતુલ પટેલ પોતાનો મોબાઈલ સ્વીચ ઓફ કરીને ભૂગર્ભમાં ઉતરી ગયો હતો.
SOG એક્શન મોડમાં, રિમાન્ડ દરમિયાન થશે મોટા ખુલાસા
આરોપીને પકડવા માટે ખેડા એસ.ઓ.જી. (SOG) દ્વારા અલગ-અલગ ટીમો બનાવી તેના સંભવિત આશ્રયસ્થાનો પર દરોડા પાડવામાં આવી રહ્યા હતા. આ દરમિયાન મળેલી ચોક્કસ બાતમીના આધારે 11 દિવસની ભારે જહેમત બાદ પોલીસે મુખ્ય સૂત્રધાર મિતુલ પટેલને ઝડપી પાડવામાં સફળતા મેળવી છે. પોલીસ અધિકારીઓના જણાવ્યા અનુસાર, આરોપીને ટૂંક સમયમાં જ નામદાર કોર્ટ સમક્ષ રજૂ કરવામાં આવશે અને તેના દિવસોના રિમાન્ડ મેળવવાની તજવીજ હાથ ધરાશે. રિમાન્ડ દરમિયાન આ ગેરકાયદેસર ફેક્ટરીમાં કેમિકલ ક્યાંથી આવતું હતું, માલ કોને સપ્લાય થતો હતો અને આ કાળા કારોબારમાં અન્ય કયા કયા વચેટિયા કે અધિકારીઓની મિલીભગત છે તે અંગેના મોટા ખુલાસા થવાની પૂરેપૂરી શક્યતા છે.
આ પણ વાંચો: Ahmedabad: શહેરમાં પાલતુ બિલાડી અને શ્વાન માટે રજીસ્ટ્રેશન ડ્રાઇવ શરૂ, 30 સપ્ટેમ્બર સુધી ઓનલાઇન અરજી કરી શકાશે
