ખેડા જિલ્લાના ઠાસરામાં વહેલી સવારે લૂંટની એક અત્યંત ચકચારભરી ઘટના બની હતી. તીનબત્તી વિસ્તારમાં આવેલા પાન-બીડીના ગલ્લા પર અજાણ્યા શખસે ઝપાઝપી કરી મોબાઇલ લૂંટી લીધો હતો. આ લૂંટારૂને પકડવા દોડેલા યુવકનું તલાવડીમાં ખાબકી ડૂબી જતાં કરુણ મોત નીપજ્યું છે. આ દુર્ઘટનાને કારણે સમગ્ર ઠાસરા પંથકમાં ભારે શોક સાથે ચકચાર મચી છે.
આસપાસના વિસ્તારમાં ભારે દોડધામ મચી ગઈ
પ્રાપ્ત વિગતો અનુસાર, ખેડા જિલ્લાના ઠાસરામાં આવેલા તીનબત્તી વિસ્તારમાં વહેલી સવારે પાન-બીડીના ગલ્લા પર કામગીરી ચાલી રહી હતી. તે દરમિયાન એક અજાણ્યો શખસ અચાનક ત્યાં આવી પહોંચ્યો હતો. આ અજાણ્યા શખસે ગલ્લા પર હાજર વ્યક્તિ સાથે અચાનક ઝપાઝપી શરૂ કરી દીધી હતી. ઝપાઝપી કરી આ શખસે ગલ્લા પરથી રૂ. 15 હજારની કિંમતનો ઓપ્પો મોબાઇલ લૂંટી લીધો હતો. મોબાઇલ ફોન આંચકી લીધા બાદ લૂંટારૂ ત્યાંથી ઝડપથી નાસી છૂટવા લાગ્યો હતો. વહેલી સવારે બનેલી આ ઘટનાને પગલે આસપાસના વિસ્તારમાં ભારે દોડધામ મચી ગઈ હતી.
યુવકનું ઘટનાસ્થળે જ કરુણ મોત નીપજ્યું
લૂંટની ઘટના બનતાં જ ગલ્લા પર હાજર યુવક અને નજીકના અન્ય દુકાનદારે હિંમત દાખવી હતી. બંને જણાએ લૂંટારૂને પકડવા માટે તરત જ તેનો પીછો શરૂ કર્યો હતો. લૂંટારૂ આગળ ભાગી રહ્યો હતો અને યુવક તેમજ અન્ય દુકાનદાર પાછળ દોડી રહ્યા હતા. ભાગતો લૂંટારૂ ઠાસરા બસ સ્ટેન્ડ પાછળના વિસ્તાર તરફ દોડ્યો હતો. તેની પાછળ દોડી રહેલો યુવક પણ પીછો કરતાં કરતાં બસ સ્ટેન્ડ પાછળ પહોંચ્યો હતો. ત્યાં આવેલી ભૂલી તલાવડી નજીક દોડતી વખતે યુવક અચાનક પાણીમાં ખાબક્યો હતો. કમનસીબે આ યુવકને પાણીમાં તરતાં આવડતું ન હતું. પરિણામે તે તલાવડીના ઊંડા પાણીમાં ગરકાવ થઈ ગયો હતો. પાણીમાં ડૂબી જવાથી યુવકનું ઘટનાસ્થળે જ કરુણ મોત નીપજ્યું હતું.
ભૂલી તલાવડીમાંથી યુવકનો મૃતદેહ બહાર કઢાયો
આ દુર્ઘટના બાદ બસ સ્ટેન્ડ પાછળ આવેલી ભૂલી તલાવડીમાંથી યુવકનો મૃતદેહ બહાર કઢાયો હતો. આ સમગ્ર લૂંટ અને પીછાની ઘટના નજીકના સીસીટીવી કેમેરામાં કેદ થઈ ગઈ હતી. સીસીટીવી ફૂટેજની તપાસમાં લૂંટ અને યુવકના પીછાની સમગ્ર હકીકત સામે આવી છે. આ બનાવ અંગે અજાણ્યા લૂંટારૂ સામે ઠાસરા પોલીસ મથકે ફરિયાદ નોંધાઈ છે. પોલીસે આ મામલે ગુનો નોંધીને ફરાર લૂંટારૂની શોધખોળ શરૂ કરી છે. મોબાઇલ લૂંટમાં યુવકનું મોત થતાં સમગ્ર ઠાસરામાં ભારે ચકચાર મચી જવા પામી છે.
આ પણ વાંચોઃ Kheda News: પેટલાદમાં અજાણ્યા વાહને બાઇકને ટક્કર મારતાં મહિલાનું મોત નીપજ્યું
