Kutch News: ભુજમાં મોટી દુર્ઘટના ટળી, વાઈબલ હોસ્પિટલમાં AC બ્લાસ્ટ થતાં ભીષણ આગ

કચ્છના મુખ્ય મથક ભુજ શહેરમાંથી આગની લાગવાની ઘટના સામે આવી છે. ભુજના અત્યંત વ્યસ્ત ગણાતા હોસ્પિટલ રોડ પર આવેલી જાણીતી 'વાઈબલ હોસ્પિટલ'માં અચાનક આગ ફાટી નીકળતાં સમગ્ર વિસ્તારમાં અફરાતફરીનો માહોલ સર્જાયો હતો. દર્દીઓ અને હોસ્પિટલ સ્ટાફમાં ઘડીભર માટે ભારે ગભરાટ ફેલાઈ ગયો હતો.

એર કંડિશનરમાં જોરદાર બ્લાસ્ટ થતાં લાગી આગ

પ્રાપ્ત વિગતો અનુસાર, વાઈબલ હોસ્પિટલમાં અચાનક એર કંડિશનરમાં ટેકનિકલ ખામી સર્જાવાને કારણે જોરદાર બ્લાસ્ટ થયો હતો. શોર્ટ સર્કિટ કે ગેસ લીકેજના લીધે થયેલા આ બ્લાસ્ટ બાદ હોસ્પિટલના પરિસરમાં ધુમાડાના ગોટેગોટા જોવા મળ્યા હતા. આગ લાગતાની સાથે જ તાત્કાલિક સ્થાનિક તંત્ર અને ફાયર વિભાગને જાણ કરવામાં આવી હતી.

ફાયર બ્રિગેડની ટીમે ભારે જહેમત બાદ આગ પર મેળવ્યો કાબૂ

ઘટનાની ગંભીરતાને જોતાં ભુજ ફાયર વિભાગની ટીમ વોટર ફાઈટર અને જરૂરી સાધનો સાથે તાત્કાલિક ઘટના સ્થળે દોડી આવી હતી. ફાયર ફાઈટરોએ સતત પાણીનો મારો ચલાવીને અંદાજે એક કલાકની ભારે જહેમત અને કથિત પરિશ્રમ બાદ આગ પર સંપૂર્ણ કાબૂ મેળવી લીધો હતો. ફાયર સ્ટાફની ત્વરિત કામગીરીને કારણે આગને વધુ પ્રસરતી અટકાવી શકાઈ હતી.

સદનસીબે કોઈ જાનહાનિ નહીં, તંત્રએ લીધો રાહતનો શ્વાસ

આ સમગ્ર દુર્ઘટનામાં સૌથી રાહતના સમાચાર એ છે કે, સમયસર લેવામાં આવેલા પગલાંને કારણે કોઈ જાનહાનિ થઈ નથી. આગ લાગતાની સાથે જ હોસ્પિટલમાંથી લોકોને સુરક્ષિત રીતે બહાર કાઢી લેવામાં આવ્યા હોવાનું જાણવા મળ્યું છે. મોટી હોનારત ટળતાં હોસ્પિટલ સત્તાધીશો, દર્દીઓના પરિવારજનો અને ફાયર વિભાગે રાહતનો શ્વાસ લીધો છે. હાલમાં આગના કારણે થયેલા નુકસાનનું આકલન કરવામાં આવી રહ્યું છે.

આ પણ વાંચો - Kutch: ગાંધીધામમાં મોડી રાત્રે 50 જેટલા ગેરકાયદે બાંધકામો તોડી સરકારી જમીન દબાણમુક્ત કરાઈ