ગુજરાતના કચ્છ સ્થિત મુંદ્રા પોર્ટ પરથી સપ્ટેમ્બર 2021માં ઝડપાયેલા આશરે 3000 કિલોગ્રામ હેરોઈન ડ્રગ્સના બહુચર્ચિત કેસમાં કેન્દ્રીય એજન્સી એન્ફોર્સમેન્ટ ડિરેક્ટોરેટ (ED) દ્વારા બહુ મોટી કાર્યવાહી કરવામાં આવી છે. આ આંતરરાષ્ટ્રીય ડ્રગ્સ રેકેટના કાળા નાણાંને સફેદ કરવાના મસમોટા કૌભાંડમાં ઈડીની ટીમે દિલ્હીના કુખ્યાત રહીશ હરપ્રીત સિંહ તલવાર ઉર્ફે કબીર તલવારની ધરપકડ કરી લીધી છે. ધરપકડ પૂર્વે ઈડી દ્વારા દિલ્હીમાં પાંચથી છ જેટલા શંકાસ્પદ ઠેકાણાઓ પર વ્યાપક દરોડા પાડીને સર્ચ ઓપરેશન હાથ ધરવામાં આવ્યું હતું. ત્યારબાદ 24 જૂનના રોજ સત્તાવાર ધરપકડ કરીને આરોપીને સ્પેશિયલ પીએમએલએ (PMLA) કોર્ટ સમક્ષ રજૂ કરવામાં આવ્યો હતો, જ્યાં કોર્ટે તેને રિમાન્ડ પર સોંપવાનો આદેશ કર્યો છે.
3000 કિલોગ્રામ હેરોઈન ડ્રગ્સના બહુચર્ચિત કેસ
આ સમગ્ર હાઈ-પ્રોફાઈલ મામલો 13 સપ્ટેમ્બર 2021ના રોજ મુંદ્રા પોર્ટ પર અફઘાનિસ્તાનથી ટેલ્કમ પાવડરના નામે આવેલા કન્ટેનરમાંથી પકડાયેલા કરોડો રૂપિયાના 3000 કિલો હેરોઈનના જથ્થા સાથે જોડાયેલો છે. અગાઉ ઓગસ્ટ 2022માં નેશનલ ઇન્વેસ્ટિગેશન એજન્સી (NIA) દ્વારા પણ આ જ કેસના ટેરર ફંડિંગ અને સ્મગલિંગના કનેક્શનને લઈને હરપ્રીત સિંહ તલવારની ધરપકડ કરવામાં આવી હતી. જો કે, આરોપી હરપ્રીત તલવાર હાલમાં જામીન પર જેલની બહાર હતો.
