આગામી દિવાળીના પવિત્ર તહેવારોને ધ્યાનમાં રાખીને લોકોની સ્વાસ્થ્ય સુરક્ષા પ્રત્યે મહેસાણા જિલ્લાનું ફૂડ એન્ડ ડ્રગ્સ વિભાગ સંપૂર્ણ એક્શન મોડમાં આવી ગયું છે. તહેવારોના દિવસોમાં મીઠાઈ અને ફરસાણની માંગમાં ભારે ઉછાળો આવતો હોય છે, જેનો ફાયદો ઉઠાવીને ભેળસેળખોરો પણ સક્રિય થઈ જતા હોય છે.લોકોના આરોગ્ય સાથે થતા ચેડાં અટકાવવા માટે ફૂડ વિભાગ દ્વારા શહેરભરમાં અખાદ્ય ખાદ્યપદાર્થોના વેચાણ સામે વિશેષ કડક ડ્રાઇવ શરૂ કરવામાં આવી છે.

ચીજવસ્તુઓમાં ભેળસેળ છે કે નહીં તેનો ખુલાસો થઈ શકે

આ ઝુંબેશ હેઠળ ફૂડ ઇન્સ્પેક્ટરોની જુદી જુદી ટીમો દ્વારા મહેસાણા શહેરના વિવિધ વિસ્તારોમાં આવેલી હોટલો, રેસ્ટોરન્ટ્સ, મીઠાઈની દુકાનો અને ફરસાણના વેપારીઓને ત્યાં આકસ્મિક દરોડા પાડીને સઘન ચેકિંગ હાથ ધરવામાં આવ્યું છે. કાર્યવાહી દરમિયાન વિભાગ દ્વારા વેચાણ અર્થે મૂકાયેલી વિવિધ પ્રકારની મીઠાઈઓ, દૂધની વાનગીઓ, માવો અને ફરસાણ સહિતના ખાદ્યપદાર્થોના સેમ્પલ એકત્રિત કરવામાં આવ્યા છે. આ નમૂનાઓને તાત્કાલિક ધોરણે લેબોરેટરી ટેસ્ટિંગ માટે મોકલી આપવામાં આવ્યા છે, જેથી તેમાં કોઈ હાનિકારક રસાયણો કે કેમિકલયુક્ત ભેળસેળ છે કે નહીં તેનો ખુલાસો થઈ શકે.

જથ્થો સીઝ કરી તેનો યોગ્ય જગ્યાએ નાશ કર્યો

દરોડા દરમિયાન કેટલીક દુકાનોમાંથી અખાદ્ય, દૂષિત તેમજ એક્સપાયરી ડેટ પૂર્ણ થઈ ગઈ હોય તેવી ચીજવસ્તુઓનો મોટો જથ્થો મળી આવ્યો હતો. ફૂડ વિભાગે ક્ષણનો પણ વિલંબ કર્યા વિના આવા અખાદ્ય પદાર્થોને તાત્કાલિક અસરથી સીઝ કરી તેનો યોગ્ય જગ્યાએ નાશ કર્યો હતો, જેથી આ અખાદ્ય ખોરાક લોકો સુધી ન પહોંચે અને ગંભીર બીમારીઓથી લોકોને બચાવી શકાય.ફૂડ વિભાગના અધિકારીઓએ સ્પષ્ટ કર્યું છે કે આ ચેકિંગ ડ્રાઇવ માત્ર તહેવારો પૂરતી સીમિત ન રહેતા દિવાળી પછી પણ સતત ચાલુ રાખવામાં આવશે. આ સાથે જ તમામ વેપારીઓને દુકાનમાં સંપૂર્ણ સ્વચ્છતા જાળવવા અને માત્ર ગુણવત્તાયુક્ત ચીજોનું જ વેચાણ કરવા માટે કડક સૂચનાઓ આપવામાં આવી છે.

આ પણ વાંચોઃ Ahmedabad News: AMCને 18 જ દિવસમાં વ્હીકલ ટેક્સ પેટે 23.43 કરોડની આવક થઈ