મહેસાણા મ્યુનિસિપલ કોર્પોરેશન ખાતે સ્ટેન્ડિંગ કમિટીની મહત્વની બેઠક યોજાઈ હતી. આ બેઠકમાં મહેસાણા શહેરના વિવિધ વિકાસકામો અને વહીવટી પ્રક્રિયાઓને લગતી કુલ 13 જેટલી દરખાસ્તો મંજૂરી અર્થે રજૂ કરવામાં આવી હતી. કમિટીના સભ્યો દ્વારા તમામ દરખાસ્તો પર વિગતવાર ચર્ચા-વિચારણા કરવામાં આવી હતી.

કચરાની હાથલારી ખરીદવાની દરખાસ્ત નાણાકીય બાબતોને ધ્યાને રાખી રદ કરાઈ

બેઠક દરમિયાન રજૂ કરવામાં આવેલી દરખાસ્તો પૈકી કચરાના નિકાલ માટે નવી હાથલારી ખરીદવાની દરખાસ્ત અંગે ગંભીર મંથન કરવામાં આવ્યું હતું. તપાસ દરમિયાન આ લારીઓની ખરીદી માટે દર્શાવવામાં આવેલા ભાવ બજાર કિંમત કરતાં વધુ હોવાનું માલૂમ પડ્યું હતું. જેથી પ્રજાના નાણાંનો વ્યય અટકાવવાના હેતુથી સ્ટેન્ડિંગ કમિટી દ્વારા વધુ ભાવ ધરાવતી કચરાની હાથલારી ખરીદવાની દરખાસ્તને તાત્કાલિક અસરથી રદ કરવાનો નિર્ણય લેવાયો હતો.

બગીચાની કામગીરી હવે એજન્સીના બદલે કોર્પોરેશન જાતે સંભાળશે

મહેસાણા શહેરના બગીચાઓની જાળવણી અને નિભાવણી માટે અત્યાર સુધી ખાનગી એજન્સીઓ નીમવાની પ્રથા હતી, પરંતુ આ બેઠકમાં તંત્ર દ્વારા મોટો નીતિગત નિર્ણય લેવામાં આવ્યો છે. હવેથી બગીચાઓની જાળવણી માટે અન્ય કોઈ પણ ખાનગી એજન્સીઓ નીમવામાં નહીં આવે. તેના બદલે મહેસાણા મ્યુનિસિપલ કોર્પોરેશન જાતે જ તમામ બગીચાઓની કામગીરી અને દેખરેખ સંભાળશે, જેથી ખર્ચમાં બચત થઈ શકે અને કામગીરી પર સીધો અંકુશ રાખી શકાય.


આ પણ વાંચો - Mehsana News: વહીવટદાર શાસનમાં કચરાની લારી ખરીદીમાં કરોડોના ભ્રષ્ટાચારના આક્ષેપ, વર્ક ઓર્ડર વગર જ આવી પહોંચી લારીઓ