સમગ્ર અમરેલી જિલ્લામાં ચોમાસાનો મધ્ય તબક્કો અત્યંત તોફાની સાબિત થઈ રહ્યો છે, જેમાં સાવરકુંડલા પંથકમાં મેઘરાજા અનરાધાર વરસી રહ્યા છે. સાવરકુંડલા શહેરી અને ગ્રામીણ વિસ્તારોમાં થયેલા ભારે વરસાદને પગલે જળસંકટના સ્ત્રોત સમાન ચેકડેમો પાણીથી ચિક્કાર ભરાઈ ગયા હતા. આ દરમિયાન સાવરકુંડલાના હાર્દ સમાન તાત્કાલિક હનુમાન મંદિર નજીક આવેલા ચેકડેમમાં ઉપરવાસમાંથી પાણીની અતિશય આવક થતાં, પાણીના દબાણના કારણે ચેકડેમનો મજબૂત પાળો એકાએક તૂટી પડ્યો હતો.
હનુમાન મંદિર નજીક ચેકડેમનો પાળો તૂટ્યો
https://twitter.com/sandeshnews/status/2073706913339167071
ચેકડેમનો પાળો તૂટવાની સાથે જ તેમાં સંગ્રહિત થયેલું લાખો લીટર પાણી જોરદાર ગતિથી બહાર ધસી આવ્યું હતું. આ તમામ પાણી સીધું સાવરકુંડલાની મુખ્ય નાવલી નદીના પટમાં ભળ્યું હતું. પાળો તૂટવાના કારણે નાવલી નદીના પાણીના પ્રવાહમાં જોતજોતામાં ભયજનક વધારો થઈ ગયો હતો. હાલ નાવલી નદી પોતાના બંને કાંઠા વટાવીને રૌદ્ર સ્વરૂપે બે કાંઠે વહેતી થઈ છે. નદીના તોફાની દ્રશ્યો જોવા માટે હનુમાન મંદિર નજીક લોકોના ટોળા વળ્યા હતા, પરંતુ પોલીસ કાફલાએ સુરક્ષાના ભાગરૂપે લોકોને ત્યાંથી દૂર ખસેડ્યા છે.
ચેકડેમ તૂટવાના કારણે અને નાવલી નદી બે કાંઠે વહેતી થતાં સાવરકુંડલા નગરપાલિકા અને મામલતદાર તંત્ર તાત્કાલિક હરકતમાં આવ્યું છે. નદી કિનારે આવેલા નીચાણવાળા વિસ્તારો, ઝૂંપડપટ્ટીઓ અને સોસાયટીઓમાં રહેતા લોકોને સાવધ કરી દેવામાં આવ્યા છે. તંત્ર દ્વારા લાઉડસ્પીકર મારફતે નદીના પટમાં ન જવા અને પૂરના સ્તર પર નજર રાખવા અપીલ કરવામાં આવી છે. ફ્લડ કંટ્રોલ રૂમ દ્વારા સિંચાઈ વિભાગના એન્જિનિયરોને પાળાના નુકસાનની સમીક્ષા કરવા અને વરસાદ બંધ થતાં જ તાત્કાલિક સમારકામ શરૂ કરવા માટેના આદેશો આપી દેવામાં આવ્યા છે.