સાબરકાંઠા જિલ્લાના ઇડર શહેરમાં હવામાન વિભાગની આગાહી વચ્ચે મેઘરાજાએ ધમાકેદાર એન્ટ્રી કરી છે. ઇડર પંથકમાં માત્ર 2 કલાકના ટૂંકા ગાળામાં જ 2 ઇંચ જેટલો મુશળધાર વરસાદ ખાબક્યો હતો. અચાનક તૂટી પડેલા ધોધમાર વરસાદના કારણે નગરના નીચાણવાળા વિસ્તારો અને મુખ્ય માર્ગો પર પાણી ફરી વળ્યા હતા.
પાલિકા ઉપપ્રમુખના વોર્ડ નંબર 5માં મકાનોમાં પાણી ઘૂસ્યા
માત્ર 2 ઇંચ વરસાદમાં નગરપાલિકાની પ્રી-મોન્સૂન કામગીરીના દાવાની પોલ ખુલ્લી પડી ગઈ છે. પાલિકા વિસ્તારના વોર્ડ નંબર 5માં વરસાદી પાણીના યોગ્ય નિકાલના અભાવે જળભરાવની ગંભીર સમસ્યા સર્જાઈ હતી. ચોંકાવનારી વાત એ છે કે, આ વિસ્તાર ખુદ નગરપાલિકાના ઉપપ્રમુખનો જ છે. ઉપપ્રમુખના પોતાના જ વોર્ડમાં રહેણાંક મકાનોમાં પાણી ઘૂસી જતાં રહીશોને ભારે હાલાકી ભોગવવાનો વારો આવ્યો છે.
