ગુજરાતમાં છેલ્લા ત્રણ દિવસમાં થયેલા અતિભારે વરસાદને કારણે જ્યાં જુઓ ત્યાં જળબંબાકારની સ્થિતિ સર્જાઈ છે. ખેતરો,મકાનો, સોસાયટીઓ અને રસ્તાઓ બધે જ વરસાદી પાણીનો કહેર વર્તાયો છે. ચોમાસાની સિઝન હોવાથી ખેડૂતોએ પાકની વાવણી કરી હતી. આ પાકની વાવણી પર વરસાદને કારણે ખેડૂતોને મોટુ નુકસાન સહન કરવાનો વારો આવ્યો છે. મહેમદાવાદના નવા કુણા ગામમાં અનેક ખેતરો વરસાદી પાણીમાં ગરકાવ થઈ જતાં વાવણી કરેલા પાક પર પાણી ફરી વળ્યું છે.
મહેમદાવાદના કુણા ગામે જળબંબાકાર સ્થિતિ
મહેમદાવાદ તાલુકાના કુણા ગામે ભારે વરસાદના કારણે જળબંબાકારની સ્થિતિ સર્જાઈ છે.સમગ્ર પંથકમાં 25 ઇંચથી પણ વધુ વરસાદ ખાબકતા ચારેય તરફ પાણી જ પાણી જોવા મળી રહ્યું છે. ભારે વરસાદના કારણે હીરાચંદની મુવાડી અને નવા કુણા ગામના ખેતરો જળમગ્ન બન્યા છે.હજારો વીઘા જમીનમાં વરસાદી પાણી ભરાઈ જવાથી ખેડૂતો દ્વારા કરવામાં આવેલી ડાંગરની રોપણી સંપૂર્ણપણે પાણીમાં ગરકાવ થઈ ગઈ છે.જેનાથી ખેડૂતોને ભારે નુકસાન સહન કરવાનો વારો આવ્યો છે.