ગુજરાતમાં ચાલુ વર્ષે ચોમાસુ બરાબર જામી રહ્યું છે. પહેલા રાઉન્ડ બાદ થોડો સમય વરસાદ ખેંચાયા બાદ હવે ફરી વાર મેઘરાજા જોરદાર બેટિંગ કરી રહ્યાં છે. ત્યારે રાજ્યમાં 27 જુલાઈ સુધીમાં 493.31 મીમી વરસાદ નોંધાયો છે જે સીઝનના સરેરાશ વરસાદની સામે 54.28 ટકા જેટલો થાય છે. હવામાન વિભાગે રાજ્યમાં હવે અતિભારે વરસાદનું સંકટ અટક્યું હોય તેવી આગાહી કરી છે. રાજ્યમાં સાર્વત્રિક વરસાદની સંભાવનાઓ વ્યક્ત કરવામાં આવી છે.
દક્ષિણ ગુજરાતમાં વરસાદ રહેવાની શક્યતા
હવામાન વિભાગની આગાહી પ્રમાણે હાલમાં ગુજરાતમાં અતિભારે વરસાદનું કોઈ મોટું સંકટ નથી.પરંતુ આગામી દિવસોમાં રાજ્યભરમાં વરસાદી માહોલ જળવાઈ રહેશે.હવામાન વિભાગની આગાહી મુજબ,હાલમાં રાજ્યમાં બે વરસાદી સિસ્ટમ સક્રિય થવાના કારણે સામાન્યથી મધ્યમ વરસાદની પૂરેપૂરી સંભાવના છે.વિસ્તારવાર સંભાવનાઓ જોઈએ તો દક્ષિણ ગુજરાતના વિવિધ ભાગોમાં વરસાદી ઝાપટાં ચાલુ રહેવાની શક્યતા છે.જ્યારે મધ્ય ગુજરાતમાં છૂટાછવાયા સ્થળોએ હળવો કે મધ્યમ વરસાદ પડી શકે છે.ઉત્તર ગુજરાતના કેટલાક વિસ્તારોમાં ભારે વરસાદ થવાની શક્યતા હવામાન વિભાગ દ્વારા વ્યક્ત કરવામાં આવી છે.