પાટણ શહેરમાં પડેલા ધોધમાર 2 ઇંચ વરસાદે જ નગરપાલિકાની પ્રી-મોન્સૂન કામગીરીના ધજાગરા ઉડાડી દીધા છે. વરસાદને કારણે શહેરના મોટિસરા અને પીપળા ગેટ સહિતના નીચાણવાળા વિસ્તારો તેમજ મુખ્ય માર્ગો પર ઢીંચણસમા પાણી ભરાઈ જતાં જળબંબાકારની સ્થિતિ સર્જાઈ હતી. રસ્તાઓ પર પાણી ફરી વળતાં વાહનચાલકો અને રાહદારીઓને પસાર થવામાં ભારે હાલાકીનો સામનો કરવો પડ્યો હતો.
ધારાસભ્ય કિરીટ પટેલે ટ્રેક્ટર પર સવાર થઈ સ્થિતિનો તાગ મેળવ્યો
શહેરમાં જળબંબાકારની સ્થિતિ સર્જાતાં જ પાટણના કોંગ્રેસ ધારાસભ્ય કિરીટ પટેલ પોતે લોકોની વહારે આવ્યા હતા. તેઓ કોઈ લક્ઝરી કારને બદલે જાતે ટ્રેક્ટર ચલાવીને પાણીમાં ઉતરી પડ્યા હતા અને શહેરના વિવિધ વિસ્તારોમાં ફરીને પરિસ્થિતિની સમીક્ષા કરી હતી. ધારાસભ્યને આ રીતે રસ્તા પર ઉતરેલા જોઈને સ્થાનિકોએ પોતાની વ્યથા ઠાલવી હતી.