દિવાળીના મિની વેકેશન અને તહેવારોની રજાઓની મોજ માણવા માટે નર્મદા જિલ્લાના કેવડિયા સ્થિત વિશ્વની સૌથી ઊંચી પ્રતિમા 'સ્ટેચ્યુ ઓફ યુનિટી' પ્રવાસીઓ માટે સર્વોચ્ચ પસંદગીનું કેન્દ્ર બની ગયું છે. સરદાર વલ્લભભાઈ પટેલની 182 મીટર ઊંચી વિરાટ પ્રતિમાને પ્રત્યક્ષ નિહાળવા માટે સમગ્ર ગુજરાત સહિત દેશના ખૂણે-ખૂણેથી હજારો પ્રવાસીઓનું ઘોડાપૂર કેવડિયા ખાતે ઉમટી પડ્યું છે. વહેલી સવારથી જ પરિસરમાં પ્રવેશવા અને વ્યુઇંગ ગેલેરી સુધી પહોંચવા માટે પર્યટકોની લાંબી-લાંબી કતારો જોવા મળી રહી છે. પ્રવાસીઓના ભારે ધસારાને પગલે સમગ્ર કેવડિયા કોલોની વિસ્તારમાં ભારે ચહલપહલ અને અદભુત ઉત્સાહનો માહોલ સર્જાયો છે.
પ્રવાસીઓનું ઘોડાપૂર કેવડિયા ખાતે ઉમટી પડ્યું
માત્ર ગુજરાત જ નહીં, પરંતુ મહારાષ્ટ્ર, રાજસ્થાન, મધ્યપ્રદેશ, દિલ્હી, ઉત્તર પ્રદેશ અને દક્ષિણ ભારતના રાજ્યોમાંથી પણ હજારો પ્રવાસીઓ દિવાળી વેકેશનનો આનંદ માણવા સરદાર સાહેબના સાનિધ્યમાં પહોંચ્યા છે.તહેવારો દરમિયાન ધસારો રહેવાની અપેક્ષાએ મોટાભાગના પ્રવાસીઓએ અગાઉથી જ સત્તાવાર પોર્ટલ પરથી ઓનલાઇન ટિકિટ બુક કરાવી લીધી હતી. સ્લોટ મુજબ પ્રવેશ છતાં પરિસરમાં માનવ મહેરામણ છલકાઈ રહ્યું છે.