પાટણ શહેરમાં નાગરિકોના આરોગ્ય સાથે ચેડાં કરતા અસામાજિક તત્વો અને ગેરકાયદે ધંધાકીય એકમો સામે તંત્ર દ્વારા સકંજા કસવામાં આવ્યો છે. પાટણ નગરપાલિકા અને ફૂડ એન્ડ ડ્રગ્સ કંટ્રોલ એડમિનિસ્ટ્રેશન (FDCA) ની ટીમે સંયુક્ત રીતે શહેરના ડેરી તથા દૂધની બનાવટના વિવિધ એકમો પર ઓચિંતી તપાસ હાથ ધરી હતી. આ દરોડા દરમિયાન ખાદ્ય સુરક્ષાના નિયમોના ધજાગરા ઉડતા જોવા મળતા તંત્ર દ્વારા કડક પગલાં લેવામાં આવ્યા છે.
વગર લાયસન્સે ચાલતા અનધિકૃત એકમમાંથી 10 હજાર લીટર અસ્વચ્છ છાશ જપ્ત
પાટણ-સિદ્ધપુર હાઈવે પર આવેલી સુભાષનગર સોસાયટીમાં વંશી કુમાર પટેલ દ્વારા કોઈપણ જાતના અધિકૃત FSSAI લાયસન્સ વિના ગેરકાયદેસર રીતે એકમ ચલાવવામાં આવી રહ્યું હતું. તપાસમાં ખૂલ્યું કે માનવ વપરાશ માટે સંપૂર્ણપણે અયોગ્ય એવી વેસ્ટ છાશમાંથી પ્રોસેસિંગ કરીને નવી છાશ, માખણ અને ક્રીમનું ઉત્પાદન કરવામાં આવતું હતું, અને દૂધ ખરીદીનો કોઈ જ રેકોર્ડ નહોતો. ફૂડ વિભાગે આ કાર્યવાહી દરમિયાન અંદાજે રૂ. 3 લાખની કિંમતની 10,000 લીટર અસ્વચ્છ છાશ જપ્ત કરી STP ખાતે તેનો નાશ કર્યો હતો તેમજ સેમ્પલ લેબમાં મોકલ્યા હતા.
