આગામી તહેવારોની ઉજવણી દરમિયાન નાગરિકોના આરોગ્ય સાથે ચેડાં ન થાય તે હેતુથી પાટણ જિલ્લા ફૂડ એન્ડ ડ્રગ્સ વિભાગ દ્વારા ખાદ્યપદાર્થોનું વેચાણ કરતા એકમો પર સઘન તપાસ ઝુંબેશ શરૂ કરવામાં આવી છે. આ ઝુંબેશ અંતર્ગત પાટણના જૂના ગંજ બજાર વિસ્તારમાં આવેલા 'તન્ના ટ્રેડર્સ' નામના વેપારી એકમ પર ફૂડ અધિકારીઓની ટીમે ઓચિંતો દરોડો પાડ્યો હતો.
પાટણ ફૂડ એન્ડ ડ્રગ્સ વિભાગનું મેગા ઓપરેશન
તપાસ દરમિયાન આ પેઢીમાંથી મોટા પ્રમાણમાં વેચાણ અર્થે રાખવામાં આવેલી અને શહેરની વિવિધ હોટલો તથા રેસ્ટોરન્ટોમાં સપ્લાય થતી શંકાસ્પદ લાલ ચટણી મળી આવી હતી. ફૂડ વિભાગની ટીમે સ્થળ પર જ લાલ ચટણીની ગુણવત્તા અંગે શંકા જણાતાં કાયદાકીય જોગવાઈઓ મુજબ તાત્કાલિક ધોરણે રૂ. 20,340 ની કિંમતનો 678 કિલો લાલ ચટણીનો જથ્થો સીઝ કરી દીધો હતો.