ગુજરાત કોંગ્રેસમાં આગામી વિધાનસભાની ચૂંટણી પહેલા ભડકો થયો છે. તાજેતરમાં ઉત્તર ગુજરાતના કોંગ્રેસના જિલ્લા પ્રમુખો સહિતના નેતાઓ દિલ્હી પહોંચ્યા હતાં. તેમણે મોવડી મંડળને નિમણૂંકો અંગે રજૂઆતો કરી હતી. આ ઉપરાંત પ્રદેશ નેતૃત્વની કાર્યપદ્ધતિ સામે પણ સવાલો ઉઠાવ્યા હતાં. સંગઠનમાં કરવામાં આવેલી નિમણૂકો પ્રત્યે તેમણે ભારે અસંતોષ વ્યક્ત કર્યો હતો. હવે પાટણ કોંગ્રેસમાં આંતરિક વિખવાદ ચરમસીમાએ આવ્યો છે. પૂર્વ પ્રમુખ બાબુજી ઠાકોર સામે વિરોધ વ્યક્ત કરવામાં આવ્યો છે.  

બાબુજી ઠાકોર અને તેમના સમર્થકો પર તીખા પ્રહારો

પાટણ જિલ્લા કોંગ્રેસમાં લાંબા સમયથી ચાલી રહેલો આંતરિક વિખવાદ હવે ચરમસીમાએ પહોંચ્યો છે.પૂર્વ જિલ્લા પ્રમુખ બાબુજી ઠાકોર સામે સ્થાનિક આગેવાનોમાં ભારે રોષ જોવા મળી રહ્યો છે.આ પરિસ્થિતિ વચ્ચે વર્તમાન ધારાસભ્ય ડૉ.કિરીટ પટેલ અને જિલ્લા પ્રમુખ ઘેમરભાઈના સમર્થનમાં એક મહત્વપૂર્ણ પત્રકાર પરિષદનું આયોજન કરવામાં આવ્યું હતું.આ બેઠકમાં જિલ્લા પંચાયત તથા તાલુકા પંચાયતના સદસ્યો અને ઠાકોર સમાજના અગ્રણી નેતાઓ ખુલ્લેઆમ ડૉ.કિરીટ પટેલના પક્ષમાં આવ્યા હતા.પત્રકાર પરિષદ દરમિયાન સ્થાનિક નેતાઓએ પૂર્વ પ્રમુખ બાબુજી ઠાકોર અને તેમના સમર્થકો પર તીખા પ્રહારો કર્યા હતા.

વિરોધીઓ ભાજપની B-ટીમ તરીકે કામ કરતા હોવાનો આક્ષેપ

તેમણે આક્ષેપ કર્યો હતો કે વિરોધીઓ ભાજપની B-ટીમ તરીકે કામ કરી રહ્યા છે અને જ્યારે પણ ચૂંટણી નજીક આવે છે.ત્યારે ચોમાસાના દેડકાની જેમ ભાજપના ઈશારે સક્રિય થઈ જાય છે.સદસ્યોએ આક્રોશ વ્યક્ત કરતા જણાવ્યું હતું કે આ B-ટીમ સામે અગાઉ પણ પક્ષના વરિષ્ઠ સ્તરે લેખિત રજૂઆતો કરવામાં આવી છે.છતાં હજુ સુધી કોઈ કડક કાર્યવાહી કેમ કરવામાં નથી આવી? આંતરિક વિખવાદ અને વિરોધ વચ્ચે પણ સ્થાનિક કોંગ્રેસ નેતાઓએ આગામી રાજકીય ભવિષ્યને લઈને મજબૂત દાવો રજૂ કર્યો હતો.સ્થાનિક નેતાઓ અને સદસ્યોએ એકસૂરે વિશ્વાસ વ્યક્ત કર્યો હતો કે તમામ પડકારો હોવા છતાં વર્ષ 2027માં ગુજરાતમાં કોંગ્રેસની સરકાર બનશે.

આ પણ વાંચોઃ Valsad પાલિકાની સામાન્ય સભા બની ઉગ્ર: પૂરગ્રસ્ત વિસ્તારોમાં રેસ્ક્યુ કામગીરી ન થતાં સભ્યોએ મચાવ્યો હોબાળો