લાંબા સમયથી વરસાદની રાહ જોઈ રહેલા પોરબંદર જિલ્લામાં આખરે મેઘરાજાએ રૌદ્ર અને ભવ્ય રૂપ ધારણ કર્યું છે. હવામાન વિભાગ દ્વારા કરવામાં આવેલી ભારે વરસાદની આગાહી વચ્ચે પોરબંદર શહેર તેમજ આસપાસના ગ્રામ્ય વિસ્તારોમાં કાળડીબાંગ વાદળોના ગડગડાટ સાથે ધોધમાર વરસાદ તૂટી પડ્યો છે. પંથકમાં ખાબકેલા સાર્વત્રિક વરસાદને કારણે વાતાવરણમાં ઠંડક પ્રસરી ગઈ છે.
ગુજરાતના 12 જેટલા જિલ્લાઓમાં વરસાદનું રેડ એલર્ટ જાહેર
દરમિયાન, હવામાન વિભાગ દ્વારા ગુજરાતના 12 જેટલા જિલ્લાઓમાં સાંજે 4 વાગ્યા સુધી ભારેથી અતિભારે વરસાદનું રેડ એલર્ટ જાહેર કરવામાં આવ્યું છે. વાવાઝોડા અને પવન સાથેના વરસાદને કારણે નીચાણવાળા વિસ્તારો અને રસ્તાઓ પર પાણી ભરાવાની શક્યતાને પગલે સ્થાનિક તંત્ર એલર્ટ મોડ પર આવી ગયું છે.
