ગુજરાતના જીરું પકવતા ખેડૂતો માટે લાંબા સમય બાદ માર્કેટમાંથી અત્યંત ઉત્સાહજનક અને રાહતના સમાચાર સામે આવ્યા છે. વિશ્વપ્રસિદ્ધ ઊંઝા માર્કેટિંગ યાર્ડ સહિતના બજારોમાં જીરુંના ભાવમાં પ્રતિ 20 કિલો (એક મણ) દીઠ ₹1,000થી ₹1,200નો તોતિંગ વધારો નોંધાયો છે. ગત સિઝનમાં મબલખ ઉત્પાદનના ભાર હેઠળ તળિયે બેસી ગયેલા ભાવો હવે આગામી સિઝનમાં વાતાવરણના પ્રતિકૂળ સંકેતો અને 'અલ નીનો'ની સંભવિત અસરને પગલે તેજી તરફ વળ્યા છે. પડતર કિંમત કરતાં પણ ઊંચા ભાવ મળવાની શરૂઆત થતાં છેલ્લા ત્રણ વર્ષથી આર્થિક નુકસાન વેઠી રહેલા ખેડૂતોમાં નવો ઉત્સાહ જોવા મળી રહ્યો છે.
ગત વર્ષે ₹5,000 થી ગગડીને ભાવ ₹3,500 સુધી પહોંચ્યા હતા
ગત વર્ષે અનુકૂળ હવામાન અને સારો વરસાદ રહેતાં સમગ્ર ગુજરાતમાં જીરુંનું રેકોર્ડબ્રેક ઉત્પાદન થયું હતું. બજારમાં મોટા જથ્થાની આવક થતાં ઊંઝા યાર્ડમાં જીરુંના ભાવ પ્રતિ 20 કિલોએ ₹5,000 થી ગગડીને સીધા 3,500 ના તળિયે પહોંચી ગયા હતા.ઉત્પાદન વધુ હોવા છતાં વૈશ્વિક ભૌગોલિક-રાજકીય પરિસ્થિતિ , ટ્રાન્સપોર્ટેશનની સમસ્યાઓ અને સ્થાનિક વાતાવરણમાં ફેરફારના કારણે નિકાસ તથા બજારની માંગ સતત નબળી રહી હતી, જેથી ખેડૂતોને મોટો આર્થિક ફટકો પડ્યો હતો.